Oral-Tasqala joly aldaǵy jyly salynyp bitpekshi
ORAL. QazAqparat - Respýblıkalyq mańyzy bar Oral-Tasqala-RF shekarasy joly aldaǵy jyly salynyp bitpekshi, dep habarlaıdy «QazAqparat» tilshisi.
«QazAvtoJol» UK» AQ oblystyq fılıalynyń dırektory Marat Qýanshalıevtiń aıtýynsha, «Nurly jol» baǵdarlamasyna sáıkes qaıta salynyp jatqan uzyndyǵy 100 shaqyrymdy quraıtyn joldyń bıyl 68 shaqyrymy bitpekshi. Bıyl Oral-Tasqala jolynyń 4-31 km aralyǵyndaǵy 27 shaqyrym joly qaıta salyndy. Ekinshi sanatqa laıyqtalyp, qos jolaqty bolyp salynyp jatqan jol jabyny burynǵydan (eni 9 metrge deıin) keńeıtilip, sonymen qatar myqtylyǵyna mán berildi. Jol salý kezinde geotekstıl jáne qıyrshytasty mastıtti asfalt óńirde tuńǵysh ret qoldanyldy. Respýblıkalyq qana emes, halyqaralyq mańyzy bar jol bolǵandyqtan, onymen kóp júk tasymaldanatyny belgili. Eger buryn asfalt jabyny 7 tonnany kóterse, endi 13 tonnaǵa deıingi júkke shydaıtyn bolady.
Bas merdiger «ıÝnıserv» kompanııasy joldyń jańadan salǵan bóligin eki aptadan keıin ashpaqshy.
Jalpy, oblysta respýblıkalyq mańyzy bar 1392,55 km jol bolsa, sonyń 3 shaqyrymy - birinshi, 170 shaqyrymy - ekinshi, 1246,55 shaqyrymy úshinshi sanatqa jatady. Bıyl osy joldardy jóndeý men kútip ustaýǵa 12 257,8 mln teńge bólingen.
Oral-Tasqala joly kórshiles Saratov oblysymen jalǵastyratyn bolsa, respýblıkalyq mańyzy bar Chapaev-Jalpaqtal-Qaztalov, Qaztalov-Jánibek joldary da únemi nazarda. Sebebi ońtústik aýdandarǵa áli kúnge keıin qatqyl tabandy jol tartylmaǵan bolsa, ekinshiden, Qaztalov-Jánibek joly arqyly Saratov, Volgograd oblystaryna tike shyǵýǵa bolady. Sondyqtan bul baǵyttaǵy jol qurylysy da toqtamaq emes. Mysaly, bıyl Qaztalov-Jánibek jolynyń 20 shaqyrymy, Chapaev-Jalpaqtal-Qaztalov jolynyń 60 shaqyrymy kúrdeli jóndeýden ótýde. Oǵan qosa Chapaev-Jalpaqtal-Qaztalov jolynyń 35 shaqyrymyna úsh jylǵa eseptelgen jobalyq-smetalyq qujattama jasalýda. Bul joba 2020 jyly júzege asyrylǵan kezde Qaztalov aýdany ortalyǵy Qaztalovqa da asfalt jol jetetin bolady. Sonda oblys ortalyǵymen qatqyl tabandy jol qatynasy joq Bókeı ordasy men Jánibek aýdandary ǵana qalady.
