Oral-Tasqala kúre jolynda jóndeý jumystary júrgizilýde
ORAL. QazAqparat - Batys Qazaqstan oblysynda «Nurly jol» baǵdarlamasyna sáıkes Oral-Tasqala-RF shekarasy baǵytyndaǵy kúre joldy kúrdeli jóndeý jumystary jalǵasýda, dep habarlaıdy «QazAqparat» tilshisi.
Jumys barysymen tanysqan oblys ákimi Altaı Kólginov bul jobanyń Elbasynyń tikeleı baqylaýynda ekendigin, sondyqtan jol qurylysyn ýaqtyly ári sapaly bitirý kerektigin jetkizdi. Qarjy tolyqtaı bólingen, qajet materıaldyń barlyǵy bar, tehnıka men adam kúshi jetkilikti. Mamyr-maýsym aıynda aýa raıy jaýyn-shashyndy bolyp, jumystyń kesheýildegeni belgili. Endi qalǵan ýaqytty tıimdi paıdalanyp, bıylǵa josparlanǵan jumys kólemin qolaısyz mezgilge qaldyrmaı, tolyq atqaryp shyǵý kerek.
Joldy qaıta salyp jatqan «ıÝnıserv» JShS-nyń bas ınjeneri Nıkolaı Kondopolonyń sózine qaraǵanda, uzyndyǵy 104 km Oral-Tasqala-RF shekarasy jolyn kúrdeli jóndeý 2015 jyly bastalǵan bolatyn. Sodan beri 54 km jolǵa asfalt tóseldi. Bıyl 86 shaqyrymǵa deıingi jol bóligi bitip, qalǵan 18 km jol 2018 jyly salynatyn bolady. Oǵan qosa jol boıynda 10 kópir qaıta salyndy. Qazir 12 kópir jóndelý ústinde.
Jol qurylysyna «Nurly jol» baǵdarlamasyna sáıkes barlyǵy 26 mlrd teńge bólingen. Kúni búgin jumys táýlik boıy, demalyssyz júrgizilýde. Jumysshylar vahtalyq ádispen, eki aýysymda eńbek etýde. Jumys kúshi jergilikti jerden tartylýda, ıaǵnı 90 paıyzy - jaqyn mańdaǵy aýyldar turǵyndary. Bıyldyń ózinde 70 adam jumysqa qabyldanǵan. Barlyǵy jol qurylysyna 450 adam, 220 tehnıka jumyldyrylǵan.
