«Oral sý arnasynan» qorshaǵan ortaǵa keltirilgen 1,2 mln. astam teńge zalal óndirildi
ORAL. 20 qarasha. QazAqparat - BQO mamandandyrylǵan aýdanaralyq ekonomıkalyq sotynyń sheshimimen tabıǵat qorǵaý prokýrorynyń usynysy boıynsha engizilgen ekologııa departamentiniń «Oral sý arnasy» MKK-ge qatysty qorshaǵan ortaǵa keltirilgen 1217384 teńge zalaldy óndirý týraly talap aryzy qanaǵattandyryldy.
Oblys prokýratýrasynan túsken málimetke qaraǵanda, atalmysh mekeme bıylǵy kóktemde sý tasqynyna daıyndyq barysynda Jaıyq ózeni jaıylmasyndaǵy kárizdik kollektorynda gıdravlıkalyq synaqtar júrgizilgen kezde 40 tekshe metr sarqyndy sý qaldyǵyn jerge tókken.
Osy fakti boıynsha «Oral sý arnasy» MKK-ge 553 356 teńgege aıyppul salynyp, QR Ákimshilik quqyqbuzýshylyq kodeksiniń 243-baby boıynsha ákimshilik jaýapkershilikke tartylǵan.
Alaıda MKK basshylyǵyna joldanǵan narazylyq oryndalmaǵan. Sol sebepti tabıǵat qorǵaý prokýrorynyń usynysy boıynsha ekologııa departamenti sotqa MKK-den qorshaǵan ortaǵa keltirilgen zalaldy óndirý týraly talap aryz berdi.
Atalǵan negizder boıynsha sotpen talap aryz tolyq kólemde qanaǵattandyryldy.
