Oral shekara jasaǵy shekara tártibin buzǵan 381 azamatty ustady
ORAL. QazAqparat - Oral shekara jasaǵy qyzmetkerleri bıyl shekara tártibin buzǵan 381 adamdy ustady, dep habarlaıdy QazAqparat tilshisi.
QR UQK Shekara qyzmetine qarasty 2029-áskerı bólim komandıri, podpolkovnık Baýyrjan Rysbekovtiń aıtýynsha, olardyń bári de - Ortalyq Azııa respýblıkalarynyń azamattary.
Solardyń ishinde 111-i QR Ákimshilik quqyqbuzýshylyq kodeksiniń 510-babyna, 31-i 514-babyna jáne 249-y 517-babyna sáıkes ákimshilik jaýapkershilikke tartyldy.
Sonymen qatar zańsyz shekara asyrýdyń tórt birdeı turaqty tobynyń (arnasynyń) joly kesilip, olarǵa qatysty qylmystyq ister qozǵaldy.
QR Qylmystyq kodeksine sáıkes shekaradan zańsyz ótý orta dárejeli qylmys bolyp esepteledi, sondyqtan oǵan barǵandar 5 jylǵa deıin bas bostandyǵynan aıyrylady. Soǵan qaramastan, zańsyz kóshi-qondy uıymdastyrýshylar ár ótken adam úshin qyzmetterin 500-den 1500-ge deıin shartty birlikke baǵalap, ózderiniń qylmystyq is-áreketterin jalǵastyryp keledi. Negizinen olar shaǵyn toptarmen (3-5 adam) shekaradan asyrady. Bul jerde aıta ketetin jaıt, mundaı joldardy dinı ekstremızm, halyqaralyq terrorıstik uıymdarynyń ókilderi paıdalanyp ketýi múmkin.
Reseı Federatsııasy, Eýroodaq elderine tabys tabý maqsatynda aǵylatyndar nemese odan qaıtatyndar, ásirese, kóktem, kúz mezgilderinde kóbeıedi. Reseıdiń kóshi-qon zańdylyǵy qatańdala túskendikten, shekarany zańsyz kesý joldaryn izdeıtinder az emes. Oǵan qosa shekaradan óte almaǵandar keıde sol mańdaǵy sharýa qojalyqtaryna, basqa da oryndarǵa jumysqa ornalasady. Jumys berýshi arzan jumys kúshi retinde qabyldaǵanymen, keıin olardyń zańsyz shekara asýyna septesýi múmkin.
Aıta keteıik, Oral shekara jasaǵynyń quramyna Zelenov, Tasqala, Bórli, Shyńǵyrlaý aýdandaryndaǵy shekaralyq aýmaq kiredi. Al oblystyń ońtústigindegi Reseımen shektesetin Bókeı ordasy, Jánibek aýdandaryn 2036-áskerı bólim shekarashylary qadaǵalaıdy.
