Oral saıajaılarynan adamdar májbúrli túrde kóshiriledi

ASTANA. KAZINFORM – Oral qalasy tóńiregindegi saıajaılarda qalǵan adamdar májbúrli túrde evakýatsııalanady. Bul týraly Batys Qazaqstan oblysy ákiminiń orynbasary Qalııar Aıtmuhambetov málim etti.

«Batys Qazaqstan oblysynda sý tasqynyna qatysty qaýipti jaǵdaı áli de bar. Bir táýlikte sý deńgeıi 24 sm qosylyp, qaýipti shekten asyp ketti. Máselen, qaýipti deńgeı 850 santımetr (Jaıyq ózeni, oblys ortalyǵyndaǵy gıdrobekette) bolsa, qazir 857 santımetrge jetti», - dedi Q. Aıtmuhambetov Ortalyq kommýnıkatsııalar qyzmetindegi brıfıngide.

Onyń aıtýynsha, osyǵan deıin Oral qalasy men Jaıyq ózeniniń boıynda ornalasqan 80 aýyldy qorǵaý baǵytynda tıisti jumystar atqaryldy.

Bul rette ondaǵan shaqyrym bógesin bekitilgen. 

«Osy jumys áli de jalǵasyp jatyr. Oǵan 2 myńǵa jýyq tehnıka men 8 myń adam jumyldyryldy», - dedi oblys ákiminiń orynbasary.

Óz kezeginde BQO tótenshe jaǵdaılar departamenti bastyǵynyń mindetin atqarýshy Rýslan Qasybaev Oral qalasy tóńiregindegi saıajaılardy sý basyp jatqanyn aıtty.

«Sol sebepti buǵan deıin saıajaı turǵyndaryn aldyn ala eskerttik. Bul jerdegi adamdar qaýipsiz jerge shyǵaryldy. Sonymen qatar, saıajaıdyń kúzetinde qalamyz degen adamdar anyqtaldy. Sý basqan saıajaılardan adamdar evakýatsııalandy», - dedi TJD ókili.

Qalııar Aıtmuhambetov sý tasqyny kezinde saıajaılardan ketýden bas tartqan adamdardy májbúrli túrde evakýatsııalaý jalǵasyp jatqanyn aıtty.

Sondyqtan óńirde evakýatsııalyq pýnkter jasaqtaldy.

Budan buryn habarlanǵandaı, Oral qalasy tóńiregindegi saıajaılar sýǵa ketip jatyr.  

BQO TJ departamenti sý basqan aýmaqtarda qalý qaýipti ekenin eskertti.  

Oral qalasynda sý basqan saıajaılardan 4 adam qutqaryldy.