Oral puty álemdegi eń kóne músin bolyp tanyldy
ASTANA. QazAqparat - Shıgır puty álemdegi eń kóne aǵash músin bolyp tanyldy. Zertteý kórsetkendeı, Reseıdiń Oral óńirinde tabylǵan músinniń jasy Mysyr pıramıdalary jáne aǵylshynnyń Stoýnhendjinen úlken bolyp shyqty.
Bul tujyrymdar Reseı jáne Germanııa ǵalymdarynyń birlesken zertteýlerinen keıin jasalǵan, dep habarlaıdy TASS.
«Orys jáne nemis ǵalymdarynyń birlesken zertteýleriniń qorytyndysy boıynsha, Shıgır putynyń jasy - 11 myń jyl. Osylaısha, onyń jasy Mysyr pıramıdalarynan shamamen eki ese úlken bolyp shyqty. Sondaı-aq, ǵalymdar puttyń balqaraǵaıdan jasalǵanyn rastady», - dep baıandady Sverdlovsk oblystyq ólketaný murajaıynyń dırektory Natalıa Vetrova.
Úlken Shıgır puty 1890 jyly Nevıansk qalasynyń janyndaǵy Shıgır shymtezekti batpaǵyn óńdeý kezinde tabylǵan. Jerdiń ıesi graf A.A. Stenbok-Fermordyń ámirimen músin Oraldyń jaratylystaný áýesqoılary birlestigi - Sverdlovsk oblystyq ólkentaný murajaıyna saqtaýǵa berilgen.
Puttyń bıiktigi 5 metrdi quraıdy. Ol balqaraǵaı dińinen qashalǵan. Ǵalymdardyń málimetterinshe, músinge oraldyq ańshylar, balyqshylar tabynǵan.
«Ol jasy 157 jyldan kem emes balqaraǵaıdyń jarylǵan dińinen tas quralmen qashalǵan. Sondaı-aq, putta oıý-órnek izderi kórinip tur», - dep habarlady RǴA Arheologııa ınstıtýtynyń jetekshi qyzmetkeri Mıhaıl Jılın.
