Oral men Tszınchjoý baýyrlas qalalar atandy
ORAL. KAZINFORM — Batys Qazaqstan oblysy men Lıaonın provıntsııasy arasyndaǵy yntymaqtastyqty nyǵaıtýǵa baǵyttalǵan mańyzdy kelisimge Shenıan shaharynda ótken halyqaralyq konferentsııada qol qoıyldy, dep habarlaıdy oblys ákiminiń baspasóz qyzmeti.
Aspanasty elindegi aýqymdy is-sharaǵa aımaq basshysy Narıman Tóreǵalıev bastaǵan batysqazaqstandyq delegatsııa arnaıy qatysty. 50 memlekettiń ókilderi bas qosqan jıynda Qytaıdyń iri ónerkásiptik ortalyǵy sanalatyn Lıaonın provıntsııasynyń áleýeti tanystyryldy.
Konferentsııanyń jalpy otyrysynda oblys ákimi Narıman Tóreǵalıev sóz sóılep, óńiraralyq yntymaqtastyqty damytý boıynsha usynys-pikirlerin jetkizdi.
— Batys Qazaqstan oblysy — Qytaı Halyq Respýblıkasynyń tóraǵasy Sı Tszınpınniń Astana qalasynda jarııalaǵan «Bir beldeý — bir jol» bastamasynyń mańyzdy tranzıttik toraby. Kelissózder men qoldaýdyń nátıjesinde qytaılyq kompanııalar suıyq metanol, tsement zaýyttary, gaztýrbınalyq jáne jel elektr stansalaryn salýǵa kiristi. Ózge de joba-josparlarymyz az emes. Byltyr BQO men Qytaı arasyndaǵy taýar aınalymy 1,5 ese ósip, 175 mln AQSh dollaryna jetti. Biz Lıaonın provıntsııasymen ınnovatsııalyq sheshimder, jasandy ıntellekt, óńdeý ónerkásibi salasynda ınvestıtsııalyq baılanystardy odan ári tereńdetýge daıynbyz, — dedi Narıman Tóreǵalıev.
Lıaonın provıntsııasyna qarasty shaharlar álemniń 96 qalasymen baýyrlas. Búgin bul qatarǵa Batys Qazaqstan oblysynyń ortalyǵy da qosyldy. Oral men Tszınchjoý qalalarynyń basshylyǵy baýyrlastyq qatynastar ornatý týraly nıettestik hattamasyna qol qoıdy. Onyń aıasynda taraptar saýda-ekonomıkalyq, ǵylymı-tehnıkalyq, mádenı-sporttyq jáne ózge de mańyzdy baǵyttar boıynsha turaqty baılanys ornatýǵa ýaǵdalasty.
