Oral men Aqsaıda jańadan qoqys polıgony salyna ma

ORAL. KAZINFORM — Oral men Aqsaı qalalarynda jańadan qatty turmystyq qaldyqtar polıgonyn salý ózekti másele bolyp tur.

BQO boıynsha ekologııa departamentiniń málimetine qaraǵanda, qazirgi qoldanystaǵy polıgondar Oralda 1975 jyly, Aqsaıda 1986 jyly paıdalanýǵa berilgen. Jobalyq paıdalaný merzimi aıaqtalǵanyna qaramastan, qaldyqtardy ornalastyrýǵa jáne kómýge múmkindik bolǵannan keıin polıgondar áli kúnge paıdalanylyp otyr.

Osy másele boıynsha Ekologııa jáne tabıǵı resýrstar mınıstrligi Kazinform tilshisiniń saýalyna jaýap berdi.

Hatta jergilikti atqarýshy organnyń aqparaty boıynsha Oral qalasynda jańa qatty turmystyq qaldyqtar polıgonyn salýǵa 2020 jyly tehnıkalyq-ekonomıkalyq negizdeme daıyndalǵan. Aýdany 70 gektar jer telimi bólingen. 

Mınıstrlik málimetine qaraǵanda, qazirgi ýaqytta 101,8 mln teńgege jobalyq-smetalyq qujattama ázirlendi.

Qurylystyń boljamdy quny — 20 mlrd teńge. Joba memlekettik saraptamaǵa joldanady.

Aqsaı qalasynda jańa QTQ polıgonyn salýǵa 2022 jyly tehnıkalyq-ekonomıkalyq negizdeme daıyndalyp, aýdany 40,0 ga jer telimi bólindi. Qazirgi ýaqytta 38,9 mln teńge qarastyrylyp, JSQ ázirlenýde. 

— Sonymen qatar qoldanystaǵy polıgondy jabý maqsatynda «Oral qalasyndaǵy QTQ polıgonyn rekýltıvatsııalaý» boıynsha jobalyq-smetalyq qujattama jasalyp, jobaǵa memlekettik saraptamanyń oń qorytyndysy alyndy. Jumys quny — 12 mlrd teńge. Búginde atalǵan jobalardan ózge QTQ salasyndaǵy máselelerdi sheshý maqsatynda ınvestorlar tartý boıynsha jumystar júrgizilýde, — delingen resmı jaýapta. 

Eske sala keteıik, budan buryn BQO-da 150-ge jýyq qatty turmystyq qaldyqtar polıgonynyń tek 17-sine ruqsat berilgenin jazǵan edik.

Sondaı-aq Batys Qazaqstanda 60-tan astam zańsyz qoqys úıindisi anyqtaldy.