Oral men Aqsaıda qatty turmystyq qaldyqtar polıgony nelikten salynbaı otyr
ORAL. KAZINFORM – Batys Qazaqstan oblysynda ekologııa salasynda jol kartasyna sáıkes kózdelgen úsh is-shara oryndalmaı qaldy.
BQO boıynsha ekologııa departamentiniń basshysy Murat Ermekqalıevtiń óńirlik kommýnıkatsııalar qyzmeti alańynda ótken brıfıngide málim etkenindeı, oblys ákimi men Ekologııa mınıstri 2020 jyly qazan aıynda bekitken óńirdiń ekologııalyq máselelerin keshendi sheshý boıynsha 2021-2025 jyldarǵa arnalǵan jol kartasynyń merzimi aıaqtaldy.
Murat Shymanǵalıulynyń sózine qaraǵanda, josparlanǵan 17 is-sharanyń 13-i sheshimin tapty. Sonyń ishinde 9-y júzege asyrylsa, 4-eýi turaqty baqylaýǵa alynǵan. Aıtalyq, Memleket basshysynyń tapsyrmasyn oryndaý maqsatynda BQO-nyń eldi mekenderin kógaldandyrýdyń jáne jasyl aımaq qurýdyń 2021-2025 jyldarǵa arnalǵan óńirlik josparyna sáıkes 5 jylda Oral qalasy men aýdandarda 722,8 myń túp aǵash otyrǵyzý josparlanǵan edi. Kúni búgin bul 100,5 paıyzǵa (726,8 myń) oryndaldy.
– Úsh is-shara oryndalmady. Atap aıtqanda, Oral jáne Aqsaı qalalarynda jańadan qatty turmystyq qaldyqtar polıgonyn salý, eskilerin rekýltıvatsııalaý qolǵa alynbady. Sondaı-aq Aqsaıda káriz-tazartý qurylystaryn tolyq rekonstrýktsııalaý jáne Oralda «Batys sý arnasy» JShS-nyń aınalymdy sýmen jabdyqtaý jelileri men qurylystaryn salý kidirip tur. Munyń negizgi sebebi – qarjynyń jetispeýi. Mysaly, jergilikti atqarýshy organdardyń málimetine sáıkes tek Oral qalasynda jańa polıgon salý úshin shamamen 20 mlrd teńge kerek. Mundaı kólemde jergilikti bıýdjette joq. Sondyqtan bul máselelerdi sheshý úshin ınvestorlar izdestirilip jatyr, - dedi M.Ermekqalıev.
Onyń aıtýynsha, taǵy bir is-sharanyń merzimi 2028 jylǵa deıin uzartylǵan. Prezıdenttiń Batys Qazaqstan oblysynyń orman qorynda 56,6 mln túp aǵash otyrǵyzý tapsyrmasyna sáıkes kúni búginge deıin 39 mln kóshet (69 paıyz) egildi. Bul baǵyttaǵy jumystar jalǵasady.
Eske sala keteıik, budan buryn BQO-da ken ornynda gaz alaýy jaǵylýyna baılanysty taıaýdaǵy aýylǵa keler qaýip qandaı ekenin jazǵan edik.