Oral mektepteriniń kópshiliginde balalardy tamaqtandyrý nege bir fırmaǵa berilgen

ORAL. KAZINFORM – Áleýmettik jelide Oral qalasyndaǵy mektepterde ashanada balalardy tamaqtandyrý máselesiniń durys uıymdastyrylmaı otyrǵany jóninde másele kóterildi. 

Qala turǵyny Aıbolat Bókenovtiń Facebook áleýmettik jelisindegi paraqshasynda málim etkenindeı, oblys ortalyǵyndaǵy mektepterdiń 50-60 paıyzynda ashanada balalardy tamaqtandyrýdy birneshe jyldan beri «Otaý alań» fırmasy utyp alyp, ony qosalqy merdigerlerge berip kelgen. Onyń aıtýynsha, bul zańǵa qaıshy, QR Bilim jáne ǵylym (qazirgi Oqý-aǵartý) mınıstrliginiń qaǵıdalaryna saı kelmeıdi.

Osyǵan baılanysty Oral qalasynyń bilim berý bólimi jaýap berdi.

Mekeme málimetine qaraǵanda, Oral qalasyndaǵy mektepterde ashanada balalardy tamaqtandyrý memlekettik-jekeshelik áriptestik senimgerlik basqarý negizinde júzege asyrylady.

— Memlekettik-jekeshelik áriptestik senimgerlik basqarý kelisim sharty Batys Qazaqstan oblysynyń bilim basqarmasymen 2020 jyly jasalǵan. 2015 jylǵy 31 qazandaǵy «Memlekettik-jekeshelik áriptestik týraly» QR Zańynyń 12-baby 2-tarmaǵyna sáıkes jáne memlekettik-jekeshelik áriptestik senimgerlik kelisiminiń 77-baby 5-tarmaqshasynda jeke áriptes óz mindettemelerin oryndaý barysynda memlekettik áriptestiń kelisimimen qosalqy oryndaýshyǵa berý quqyǵyna ıe ekeni kórsetilgen. Memlekettik-jekeshelik áriptestik «Memlekettik-jekeshelik áriptestik týraly» Zańy aıasynda júzege asyrylatynyn jáne QR Bilim jáne ǵylym mınıstrliginiń 2018 jylǵy 31 qazandaǵy № 598 buıryǵymen rettelmeıtinin eske salamyz, - dep habarlady vedomstvodan.

Eske sala keteıik, budan buryn qalanyń qoqysqa tolýyna baılanysty Oral ákimdigi jaýap bergenin jazǵan bolatynbyz.