Oral-Kóshim júıesiniń 4 sý qoımasyna sý jınalyp jatyr
ASTANA. KAZINFORM – Sý tasqyny týraly áńgime bólek, sýarý maýsymyn da esten shyǵarmaǵan jón. Bul rette, elimizde «Qazsýshar» fılıaldary tasqyn sýyn apatsyz ótkizýdi qamtamasyz etip, aldaǵy sýarý maýsymyna daıyndalyp jatyr.
Ortalyq kommýnıkatsııalar qyzmetinde ótken brıfıngte QR Sý resýrstary jáne ırrıgatsııa mınıstrliginiń resmı ókili Móldir Ábdýalıeva bul baǵyttaǵy jumystarǵa toqtaldy.
Sý tasqyny kezinde «Qazsýshar» mekemesiniń Soltústik Qazaqstan fılıalynyń mamandary Sergeev sý torabynyń jaǵalaýyn nyǵaıtý jumystaryn júrgizgen. 82 tonnadan astam tas, 15 temirbeton plıta, 25 temirbeton blok jáne basqa materıaldar tóseldi. Kaztalov aýdanynda kóktemgi tasqyn sýdy apatsyz ótkizý úshin «Qazsýshardyń» Batys Qazaqstan fılıaly Úlken Ózen ózenindegi ýaqytsha jer bógetterin ashty. Nátıjesinde sý lımandary men tabıǵı shabyndyqtarǵa jiberilip, eldi mekenderdi sý basý qaýpi azaıdy. Sonymen qatar, sý tasqynynyń ekinshi tolqyny kezinde Oral-Kóshim sýarý-sýlandyrý júıesiniń 4 sý qoımasyna sý jınalyp jatyr. Qazir onda 200 mln tekshe metrden astam sý jınaldy, bul jalpy kólemniń 84%-n quraıdy. «Qazsýshar» mamandary Reseı Federatsııasynyń Orynbor jáne Saratov oblystarynyń sý qyzmetterimen únemi aqparat almasyp otyr.
«Abaı oblysynyń Úrjar aýdanynda Qarakól sý qoımasynyń qurylystary, Kókpekti aýdanynda Úlken Bóken ózenindegi sý toraby tazartyldy. Shyǵys Qazaqstan fılıaly Kúrshim aýdanyndaǵy «Jaýǵashty» magıstraldyq kanalynyń bas qurylysyn tazartty. Marqakól aýdanynyń Orta-Terekti sý qoımasynda ınertti materıaldar daıyndaldy», – dedi Móldir Ábdýalıeva.
