Oral kıikteriniń óristeýin sheshý jumys toby shuǵyl iske kirisýi kerek - Ekologııa mınıstri

NUR-SULTAN. QazAqparat – Memleket basshysy Qasym-Jomart Toqaevtyń tapsyrmasymen QR Ekologııa, geologııa jáne tabıǵı resýrstar mınıstri Maǵzum Myrzaǵalıev Batys Qazaqstan oblysyna jumys saparymen bardy, dep habarlaıdy QazAqparat tilshisi.

Sapar aıasynda mınıstr ǵalymdarmen, ekologtarmen birge jergilikti turǵyndar kótergen kıik sanynyń kóbeıýine baılanysty jaıylymdyq jerlerdiń tarylýyna qatysty máseleni sheshý joldaryn talqylady.

«Sizderge Prezıdent tapsyrmasymen ǵalymdarmen birge arnaıy kelip otyrmyn. Eki jaqqa da tıimdi sheshimder qabyldaý úshin Ekologııa, Aýyl sharýashylyǵy, Bilim jáne ǵylym mınıstrlikteri jáne halyqaralyq uıymdar, ınstıtýttar quramyna kiretin jumys tobyn quryp otyrmyz. Qysqa merzimde zertteýlerdi bitirýge tyrysamyz»,- dedi mınıstr.

Maǵzum Myrzaǵalıev máseleniń sheshiminiń úsh jolyn atady.

«Birinshisi - jalpy aýdany 343040,1 gektar «Bókeıorda» memlekettik tabıǵı rezervatyn, sondaı-aq jalpy aýdany 314505,1 gektar Aşyózek memlekettik tabıǵı qaýmalyn qurý. Bul boıynsha barlyq negizdemeler daıyn. Rezervat qurý arqyly jańa jumys oryndary da ashylady. Ekinshisi - osy rezervatta geologtardyń aralasýymen sý kózderin anyqtap, kıikterge jasandy sýat daıyndaý. Ol tek kıikke ǵana emes, halyqqa da paıdaly. Úshinshiden kıikterdiń Oral popýlıatsııasynyń bir bóligin Jaıyqtyń oń jaǵalaýyn ótkizý máselesin qarastyramyz», - dedi mınıstr.

Batys Qazaqstan oblysynyń ákimi Ǵalı Esqalıev qurylǵan jumys tobyna jergilikti sharýa qojalyqtary ókilderi de kiretinin, barlyq zertteýler, sharalar ashyq júretinin jetkizdi.

QR BǴM Zoologııa ınstıtýtynyń terıologııa zerthanasynyń meńgerýshisi Alekseı Grachev qazir kıik sanyn retteý máselesin múldem qozǵaýǵa bolmaıtyndyǵyn aıtady.

«Qandaı da bir sheshim qabyldamas buryn, máseleni egjeı-tegjeıli zerdeleý qajet. Memleket óz ýaqytynda kıikterdiń sanyn qalpyna keltirý úshin úlken resýrstar jumsady. Qazir ol tek qalpyna keltirý satysynda, ıaǵnı ol áli de maksımýmǵa jetken joq. Sol sebepti ázirge olardy atýǵa ruqsat berip, sanyn azaıtý týraly sóz qozǵaýǵa erte», - dedi ǵalym.

Aıta keteıik, Batys Qazaqstan oblysy – elimizdegi kıikter eń kóp shoǵyrlanǵan óńir. 2019 jylǵy sanaq boıynsha BQO aýmaǵynda 217 myń bas kıik bolǵan. 2020 jyly koronavırýs pandemııasyna baılanysty sanaq júrgen joq. 2023 jylǵa deıin kıikterdi ǵylymı qoldanystan basqa maqsatta qoldanýǵa zańmen tyıym salynǵan.