Oral qalasynyń polıtseıleri balyq tıelgen eki avtokólikti ustady
ORAL. QazAqparat – Oral qalasynyń polıtseıleri balyq tıelgen eki avtokólikti ustady, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, 27 sáýirge qaraǵan túni Zachagan kentindegi M.Móńkeuly kóshesi boıynda «Folksvagen Sharan» avtokóligi toqtatyldy.
1988 jylǵy júrgizýshi aıdap kele jatqan avtokóliktiń kýzovynan tıisti qujaty joq 800 kg qarakóz balyǵy tabyldy.
Sol sekildi «Sarytaý» shaǵynaýdany mańynda Aqjaıyq aýdanynyń 1995 jylǵy turǵyny júrgizgen «Folksvagen Golf 3» avtokóligin teksergen kezde odan da qujaty joq 500 kg qarakóz balyǵy shyqty.
Atalǵan derekter boıynsha Shaǵan polıtsııa bólimi QR QK 196-baby 1-bóligine (kórineý qylmystyq jolmen tabylǵan múlikti ıemdený nemese ótkizý) sáıkes tergeý amaldaryn júrgizýde.
