Oral qalasynyń halqy 300 myńǵa jýyqtady
ORAL. QazAqparat - Oral qalasynyń halqy 291 myńǵa jetti, bul aldyńǵy jylǵydan 2,3 paıyzǵa kóp. Bul týraly búgin qoǵamdyq keńes músheleri aldynda esep bergen qala ákimi Narıman Tóreǵalıev málim etti, dep habarlaıdy «QazAqparat» HAA tilshisi.
Onyń aıtýynsha, qazirgi tańda qala halqy oblys turǵyndarynyń 46 paıyzyn quraıdy. Sońǵy bes jylda shahar turǵyndary 31 myń adamǵa ósti. Ol negizinen ishki kóshi-qonnyń jáne dúnıege kelgen nárestelerdiń esebinen kóbeıýde. Mysaly, 2016 jyly 8388 sábıdiń ómir esigin ashqany tirkeldi, bul 2015 jylǵydan (7582) 11 paıyzǵa artyq. Al halyqtyń tabıǵı ósimi 5505 adamǵa kóbeıdi, bul aldyńǵy jylǵydan (4780) 16 paıyzǵa artqan.
Oblys ortalyǵynda ár salada ilgerileýshilik bar. Mysaly, 2016 jyly 115 mlrd. teńgeniń ónerkásip ónimi óndirildi, ósim - 15 paıyz. Osynyń 67 paıyzy (76,5 mlrd. teńge) óńdeý ónerkásibine (ósim - 4 paıyz) tıesili. Negizgi qarjyǵa qosylǵan ınvestıtsııa kólemi 43 mlrd. teńgege jýyqtap, aldyńǵy jylǵydan 19 paıyzǵa tómendegenimen, bul respýblıkalyq bıýdjet transfertteriniń azaıýyna baılanysty bolyp otyr. Esesine jergilikti bıýdjet esebinen quıylǵan qarjy 15 paıyzǵa ulǵaıyp, 5,3 mlrd. teńgeni qurady. Sol sekildi bank nesıeleri men basqa da qarajat esebinen kelgen ınvestıtsııa kólemi 2015 jylǵy 3,4 mlrd. teńgeden ótken jyly 4 mlrd. teńgege (ósim - 18 paıyz) jetti. Jeke ınvestıtsııa esebinen quny 4 mlrd. astam teńge bolatyn 40 nysan iske qosyldy.
Ár saladaǵy tabys-jetistikterge toqtalǵan shahar basshysy Narıman Tóreǵalıev Elbasynyń «Qoǵamdyq keńester týraly» Zańyna sáıkes qurylǵan qoǵamdyq keńes múshelerimen, jalpy qala turǵyndarymen birlese otyryp, oblys ortalyǵyn odan ári damytýdyń mańyzdylyǵyn atap kórsetti.
Jıynda sondaı-aq Oral qalalyq máslıhaty hatshysynyń, qoǵamdyq keńes tóraǵasynyń jáne jergilikti polıtsııa qyzmeti basshysynyń esepteri de tyńdalyp, tıisti qarar qabyldandy.
