Oral qalasynyń emhanalary qashyqtan jumys isteýge kóshti
ORAL. QazAqparat – Oral qalasynyń emhanalary qashyqtan jumys isteýge kóshti, dep habarlaıdy QazAqparat tilshisi.
Oblystyq densaýlyq saqtaý basqarmasynan túsken málimetke qaraǵanda, ár emhanada sıtýatsııalyq ortalyq saǵat 08.00-den bastap 20.00-ge deıin qyzmet atqarady.
Onda dárigerler eki aýysymda kezekshilik etedi.
Kún saıyn úılerinde JRVI jáne pnevmonııadan emdelip jatqan naýqastarǵa qońyraý shalynyp, hal-jaǵdaılary suralady. Sıtýatsııalyq call-ortalyqtyń telefony arqyly keńes berilip, sondaı-aq jedel járdem brıgadasy táýlik boıy jumys isteıdi. Endokrınolog, nevropatolog, kardıolog jáne onkolog sııaqty mamandar da kómekke kele alady.
«Qazirgideı kúrdeli jaǵdaıda turǵyndardan asa qajet bolmasa, ózderi bekitilgen emhanalarǵa barmaýdy suraımyz. Odan da ýchaskelik dárigerge qońyraý shalyp, máseleni qashyqtan sheshýge bolady. Dári-dármek úshin de emhanaǵa barýdyń qajeti joq. Sozylmaly syrqattarmen, qaterli isikpen dıspanserlik esepte turatyn barlyq emdelýshilerge asa mańyzdy dári-dármekti úılerine aparyp berý qarastyrylǵan. Emhanaǵa turǵyndar ózdiginen kelgen jaǵdaıda qyzmetkerler qyzýyn teplovızormen ólsheıdi. Qyzýy joǵary bolsa, súzgiden ótkizýge jiberiledi», dep túsinik berdi oblystyq densaýlyq saqtaý basqarmasy.
Ýchaskelerde medıtsına qyzmetkerleri túsinik jumystaryn júrgizip, qaýipsizdik sharalaryn saqtaý jóninde keńes beredi. Azamattar qandaı da aýrý belgileri baıqalsa, sıtýatsııalyq ortalyqtardyń telefondaryna habarlasa alady.
Oblysta koronavırýs juqtyrǵandar sany 3600-ge jetse, sonyń 1814-i – aýrý belgisi barlar, 1786-sy – aýrý belgisi joqtar.
2931 adam jazylyp shyqsa, 17-si ómirden ozdy.
Qazirgi tańda 592 adam juqpaly aýrýlar aýrýhanasynda jatsa, 439 adam provızorlyq statsıonarda emdelýde.
Eske sala keteıik, Batys Qazaqstanda koronavırýstan 940 adam em qabyldap jatqanyn, dári-dármekti qymbatqa satý derekteri anyqtalǵanyn jazǵan bolatynbyz.
