Oral qalasynyń bıýdjeti 24,4 mlrd. teńgeden asyp otyr

ORAL. QazAqparat - Oral qalasynyń bıylǵy bıýdjeti 24 mlrd. 419 mln. 870 myń teńgeni qurap otyr. Sonyń ishinde 10,4 mlrd. teńge bilim, 4,5 mlrd. teńge qurylys jáne 2,5 mlrd. teńge turǵyn úı-kommýnaldyq sharýashylyq salasyna bólindi. Depýtattardyń mindeti - zań sheńberinde bólingen qarjynyń oryndy ári tıimdi jumsalýyn jáne ýaqytyly ıgerilýin qadaǵalaý, únemdelgen nemese ıgerilmegen qarjyny turǵyndar men qala sharýashylyǵynyń ótkir máselelerin sheshýge baǵyttaý. Bul týraly №9 saılaý okrýgi boıynsha saılaýshylar aldynda esep bergen Oral qalalyq máslıhatynyń depýtaty, «Jaıyq Press» JShS bas dırektory Jantas Safýllın málim etti, dep habarlaıdy «QazAqparat» HAA tilshisi. 

Onyń aıtýynsha, bir jyl merzim ishinde, ıaǵnı 2016 jylǵy naýryzdan beri qalalyq máslıhattyń 9 sessııasy bolyp, onda qala ómirine qatysty eń ózekti máseleler, shahardyń áleýmettik-ekonomıkalyq damýyna qatysty bekitilgen baǵdarlamalardyń oryndalý barysy talqylandy.



Depýtattyń qala bıýdjetin talqylaý men qabyldaýǵa qatysýy asa mańyzdy bolyp tabylady, óıtkeni qarjy kózderin tıimdi bólý men jumsaý, túptep kelgende, ár turǵyn men otbasynyń ál-aýqatyna, olardyń ómirlik máseleleriniń sheshilýine yqpal etedi. Ár sessııada derlik aǵymdaǵy jaǵdaıǵa jáne týyndaǵan máselelerge sáıkes qala bıýdjetine túzetýler engizilip otyrady. Mysaly, bıýdjetti naqtylaý barysynda 2016 jyldyń tamyzynda aýla aýmaqtaryn abattandyrýǵa 344 mln. teńge, Zachagan kentindegi kópqabatty turǵyn úıler qurylysyn jalǵastyrý men ınjenerlik-kommýnaldyq jelilerdi tartýǵa 1,5 mlrd. astam teńge bólindi. Qyrkúıektegi sessııada jol-kópir sharýashylyǵyn kútip ustaýǵa 295 mln. teńge qarastyryldy. Ótken jyly qala bıýdjeti úsh ret naqtylandy.



«Áleýmettik máseleler jáne jastar isteri jónindegi turaqty komıssııa múshesi retinde qala ómirine barynsha jıi aralasyp kelemin. Mysaly, ótken jyly 70 saýal joldansa, sonyń 37-sine naqty jaýap keldi. Depýtattyq saýaldyń pármendiligine mysal retinde turǵyn úılerde gaz jabdyqtaryn tehnıkalyq qaraýdan ótkizýdiń baǵasyn negizsiz ósirý deregi boıynsha qabyldanǵan sharany aıtýǵa bolady. Osy másele boıynsha Almazov kóshesi 60-úıde turatyn qala turǵyny L.Samoılova maǵan shaǵymdandy. Sol boıynsha monopolııaǵa qarsy mekeme men prokýratýra «RTsKÝ - Ýralsk» JShS-nyń qyzmetin tekserdi. Sonyń nátıjesinde baǵany negizsiz ósirgeni úshin atalǵan mekemege aıyppul salyndy, al tarıf kólemi 4 konforalyq plıta úshin 1446 teńgeden 1056 teńgege deıin kemitildi. Ońdy nátıjeler qatarynda qoǵamdyq kóliktegi jolaqyny 80 teńgege deıin kóterýdi maquldaǵan qalalyq qoǵamdyq keńes sheshiminiń toqtatylýyn aıtýǵa bolady. Sol sekildi jer telimi kezegin retteý, okrýg aýmaǵynda aýlalardy abattandyrý, balalar aýla klýbtaryn qurý, qarapaıym sport alańdaryn salý da únemi nazarda. Aıtalyq, 2016 jylǵa josparlanǵan 30 aýlanyń ishinde №9 okrýg aýmaǵyna jatatyn biri de bolǵan joq. Qala ákiminiń atyna tıisti usynys engizý nátıjesinde bıylǵa okrýgtegi úsh aýlany abattandyrýdy ótkizý jóninde konkýrs jarııalandy, taǵy beseýiniń jobalyq-smetalyq qujattamasy jasalýda. 



2017 jylǵy jospar týraly aıtqanda, №9 saılaý okrýgi boıynsha mynadaı sharalar josparlanǵanyn jetkizgim keledi. Birinshiden, T.Shevchenko, O.Isaev kóshelerinde Á.Áıtıevten D.Nurpeıisova atyndaǵy kóshege deıin kúrdeli jóndeý, M.Yqsanov kóshesinde Chagano-Naberejnaıadan Rýbejın kóshesine deıin qaıta qurý jumystary jalǵasady. Ekinshiden, J.Dosmuhamedov, Q.Ahmerov, Á.Kerderi kóshelerin kúrdeli jóndeý úshin jobalyq-smetalyq qujattama jasalýda. Oǵan qosa Dáýletkereı kóshesin Chagano-Naberejnaıadan Elızarov kóshesine deıin jóndeýge JSQ daıyndaý kózdelýde. Úshinshiden, Muhıt kóshesi boıyndaǵy 46/3, 46/4 jáne Dosmuhamedov boıyndaǵy 77/1 turǵyn úıleriniń aýlalaryn abattandyrýǵa memlekettik satyp alýǵa konkýrs jarııalandy. Qazirgi kezde Saraıshyq, 56, D.Nurpeıisova, 14/1, 14/2, 14/3, Qurmanǵazy, 165-úıleriniń aýlalaryn abattandyrýǵa JSQ ázirlenýde. Tórtinshiden, qalalyq beıitti abattandyrýǵa qarjy bólinedi. Soǵan sáıkes beıit qorshalyp, ishki joldaryna aǵymdaǵy jóndeý júrgiziledi», -dedi J.Safýllın.



Jıyn barysynda saılaýshylar depýtatqa suraqtar qoıyp, jaýap aldy jáne usynys-tilekterimen bólisti.