Oral qalasynyń birqatar bóligi taǵy da sýsyz qaldy
ORAL. QazAqparat – Oralda káriz kollektoryndaǵy apat saldarynan qalanyń birqatar bóligi taǵy da sýsyz qaldy, dep habarlaıdy QazAqparat tilshisi.
Oblys ákimi Ǵalı Esqalıev málim etkendeı, 26 jáne 27 aqpan kúnderi M.Sholohov kóshesi boıynda káriz kollektorynda apat bolǵan.
Dıametri 1000 mm turba zaqymdanyp, topyraq opyrylsa, sodan keıin qudyq ta isten shyqty.
Turǵyn jáne saıajaı úılerin sý basý qaýpi tóngennen keıin qalanyń birqatar shaǵynaýdanyna sý berý toqtatyldy.
Qazirgi kezde «Batys sý arnasy» JShS (28 adam, 9 tehnıka) men BQO TJ departamenti kúshteri (29 qyzmetker, 9 motopompa, 9 tehnıka) oqıǵa ornynda jumys jasaýda.
Qalanyń shaǵynaýdandaryna sý tasymaly uıymdastyryldy. Birinshi kezekte áleýmettik nysandar qamtylýda. Úıinen shyǵa almaıtyn adamdar 109 telefonyna ótinim berse, eriktiler sýdy jetkizip beredi.
«Kásipkerlerden sýdyń baǵasyn ósirmeýdi, múmkindigi bolsa, tómendetýdi suraımyz. Káriz kollektorynyń jumysyn taıaý ýaqytta qalpyna keltirý úshin qoldan kelgenniń bárin jasaımyz», dedi óńir basshysy.
Eske sala keteıik, budan buryn Oralda káriz kollektoryndaǵy apattan saıajaı úılerine qaýip tóngenin jazǵan bolatynbyz.
