Oral qalasynyń ákimi senator bolyp saılandy
ORAL. QazAqparat - Búgin Batys Qazaqstan oblysynan Senat depýtatyn saılaý úshin oblystyq máslıhat zalynda depýtattardyń birlesken otyrysy boldy, dep habarlaıdy «QazAqparat» tilshisi.
Otyrysqa óńirdegi 198 depýtattyń 194-i qatysyp, olar túgeldeı daýys berdi.
Oblystyq saılaý komıssııasynyń tóraǵasy Ǵaısa Qapaqov daýys berý qorytyndysyn jarııa etti. Qurmanǵazy atyndaǵy Oral mýzyka kolledjiniń dırektory, qalalyq máslıhat depýtaty Nurjan Sertekovke 38, Oral qalasynyń ákimi Narıman Tóreǵalıevke 156 depýtat jaqtap, daýys berdi.
Narıman Tóreǵalıev halyq atynan qoldaý bildirip, senim kórsetkeni úshin depýtattarǵa rızashylyǵyn bildirdi.
Saılaýǵa barlyǵy jeti halyqaralyq baıqaýshy, úmitkerlerdiń senim bildirgen ókilderi qatysyp, ótý barysyn baqylap otyrdy.
«Saılaý joǵary deńgeıde uıymdastyryldy. Bul jóninen oblystyq saılaý komıssııasy kóp jumys tyndyrdy. Árıne, Reseımen salystyrǵanda, Qazaqstandaǵy saılaýdyń óz ereksheligi bar. Degenmen úlken aıyrmashylyq joq. Bul - meniń sizdiń eldegi saılaýǵa halyqaralyq baıqaýshy retinde birinshi qatysýym. Buǵan deıin Armenııada ótken saılaýdy baqyladyq. Ondaǵyǵa qaraǵanda, munda tártip jaqsy boldy, sharalardyń bári dál de ýaqtyly ótkizildi», dedi «QazAqparat» tilshisine kórshiles Samara oblysynan kelgen halyqaralyq baıqaýshy Valerıı Knıazkın.
Aıta keteıik, taǵy bir úmitker, «Avtokombınat» JShS dırektory Valerıı Goloýhov óz ótinishine jáne otbasy jaǵdaıyna baılanysty kandıdatýrasyn alyp tastady.
