Oral qalasyndaǵy kópirde bes avtokólik soqtyǵysyp, keptelis boldy
BQO polıtsııa departamentiniń baspasóz qyzmetinen málim etkenindeı, jol-kólik oqıǵasy shamamen búgin saǵat 08.00-de Ábilqaıyr han kóshesi boıyndaǵy Depo kópiri aýdanynda boldy.
«Eki Lada Priora, Mersedes, Renault Duster jáne Kia avtokóligi soqtyǵysty. Zardap shekkender joq. Oqıǵa ornynda polıtsııa qyzmetkerleri jumys istedi. Sol mańda bir saǵattaı kólik keptelisi boldy», dep habarlady vedomstvodan.
BQO densaýlyq saqtaý basqarmasynyń baspasóz qyzmeti atalmysh oqıǵa saldarynan aýrýhanaǵa eshkimniń túspegenin jetkizdi.
Jalpy, 1 qarashadan bastap óńirde qar jaýyp, aýa raıy qolaısyz bolyp tur.
BQO TJ departamentinen túsken málimetke qaraǵanda, 3 qarasha kúni oblysta jel kúsheıip, burqasyn kóteriletini, sondaı-aq kóktaıǵaq bolatyny jóninde eskertý jarııalandy.
Osyǵan oraı BQO polıtsııa departamenti jolda abaı bolý qajettigin eske salady.
Eske sala keteıik, budan buryn Batys Qazaqstanda eki avtokóliktiń soqtyǵysyp, 5 adamnyń zardap shekkenin jazǵan bolatynbyz.