Oral qalasynda jyljymaly egý keshenderi jumys istep jatyr
ORAL. QazAqparat – Oral qalasynda turǵyndardy koronavırýsqa qarsy ekpemen kóbirek qamtý maqsatynda jyljymaly egý keshenderi jumys istep jatyr, dep habarlaıdy QazAqparat tilshisi.
BQO densaýlyq saqtaý basqarmasynan málim etkenindeı, mobıldi egý pýnktteri kesheden beri tórt iri saýda ortalyǵy men ortalyq bazar janynda qoıylǵan.
«Munda kez kelgen tilek bildirýshi jeke kýáligin kórsetip, koronavırýsqa qarsy ekpe ala alady. Aldymen medıtsınalyq tekserýden ótip, densaýlyǵy jaqsy bolsa, egýge jiberiledi. Oraldyqtar otandyq QazVac nemese reseılik «Spýtnık V» vaktsınasynyń bireýin tańdaýyna qaraı qabyldaı alady. Egý pýnktteri qalalyq emhanalardaǵy kabınetter sııaqty saǵat 10.00-den 20.00-ge deıin jumys isteıdi», dep habarlady vedomstvodan.
Basqarma basshysynyń mindetin atqarýshy Arman Qalıbekovtiń aıtýynsha, kúni búginge deıin oblysta 32937 adam (87 paıyz) vaktsınanyń birinshi komponentimen egildi. Sondaı-aq 8408 adam ekinshi komponentti alyp úlgerdi.
Turǵyndar reseılik jáne otandyq vaktsınalarmen egilip jatyr.
Eske sala keteıik, budan buryn Batys Qazaqstanda bıyl 720 balanyń koronavırýs juqtyrǵanyn, 6 mekteptiń karantınge jabylǵanyn, 107 adamnyń kóz jumǵanyn jazǵan bolatynbyz.
