Oral qalasynda jol apatynan bes adam zardap shekti
BQO polıtsııa departamentiniń baspasóz qyzmetinen málim etkenindeı, oqıǵa 2 mamyr kúni shamamen saǵat 17.30-da boldy.
«1977 jylǵy júrgizýshi «VAZ-21140» avtokóligimen I.Konıahın kóshesimen kele jatyp, jol erejesin buzǵan. Basty kóshe bolyp sanalatyn Eýrazııa boıymen 1991 jylǵy júrgizýshi aıdap kele jatqan «Renault» avtokóligine jol bermeı, túıisken. Sodan keıin «VAZ-21140» avtokóligi jaryq baǵanyna soǵylǵan. Jol apaty saldarynan osy kólikte otyrǵan 1991 jylǵy áıel qalalyq kópbeıindi aýrýhananyń neırohırýrgııa bólimine jatqyzyldy. Sondaı-aq eki jasar bala aýrýhanaǵa tústi. 1977 jylǵy júrgizýshi dárigerler qaraǵannan keıin úıine jiberildi. «Renault» avtokóliginiń júrgizýshisi oblystyq aýrýhananyń travmatologııa bólimine jatqyzyldy. Osy kólikte bolǵan 1994 jylǵy jolaýshy dárigerler qaraǵan soń úıine jiberildi. Atalǵan derek boıynsha QR QK 345-babyna sáıkes sotqa deıingi tergeý amaldary júrgizilip, oqıǵanyń jaı-japsary anyqtalyp jatyr», dep habarlady vedomstvodan.
BQO densaýlyq saqtaý basqarmasy baspasóz qyzmetiniń naqtylaýynsha, 2 jasar balaǵa jabyq bas-mı jaraqatyn alyp, mıy shaıqalǵan degen dıagnoz qoıylyp, ol qalalyq kópbeıindi aýrýhanadan oblystyq kópbeıindi balalar aýrýhanasyna aýystyryldy. Zardap shekkender arasynda aýyr jaraqat alǵandar joq.
Eske sala keteıik, budan buryn Oralda avtobýs qaǵyp ketken 58 jastaǵy áıeldiń kóz jumǵanyn jazǵan edik.