Oral qalasynda jas jigit kópirden sekirip ketti
BQO polıtsııa departamentiniń resmı ókili Bolatbek Nurǵojınniń aıtýynsha, oqıǵa 31 mamyr kúni keshkisin «Dınamo» sport bazasy mańyndaǵy Shaǵan ózeninen ótetin kópirde bolǵan.
Saǵat 20.39-da shaqyrtý túsken.
«Kópirden sekirip ketken 23 jastaǵy jigit jaǵaǵa qaraı júzip kele jatqan. Oǵan shuǵyl jetken polıtsııa qyzmetkerleri kómektesip, shamamen saǵat 20.59-da jaǵaǵa shyǵaryp alǵan. Denesi tońazyǵan. Qazirgi kezde QR QK 105-baby 1-bóligine (ózin-ózi óltirýge deıin jetkizý) sáıkes sotqa deıingi tergeý amaldary bastaldy. Oqıǵanyń jaı-japsary anyqtalý ústinde», dedi QazAqparat tilshisine B.Nurǵojın.
BQO densaýlyq saqtaý basqarmasynyń baspasóz qyzmetiniń naqtylaýynsha, atalǵan turǵyn oblystyq aýrýhanaǵa jetkizilgen.
Eske sala keteıik, budan buryn Oralda 48 jastaǵy áıeldiń 10 kúnnen beri izdestirilip jatqanyn jazǵan bolatynbyz.
