Oral qalasynda jańa mektep paıdalanýǵa berildi

Qalaǵa qarasty Derkól kentinde boı kótergen 600 oryndyq bilim ordasynyń ashylý rásimine qatysqan óńir basshysy Altaı Kólginovtiń atap ótkenindeı, bul - «Nurly jol» baǵdarlamasy aıasynda oblys ortalyǵynda qurylysy qolǵa alynǵan tórt mekteptiń biri. Atalmysh baǵdarlama aıasynda 2400 oryndyq tórt mektep qurylysyna 3,5 mlrd teńge bólingen bolatyn. Bul memleket tarapynan bilim salasyna udaıy qoldaý-kómek jasalyp otyrǵanyn kórsetedi.
 

Elbasynyń bıylǵy Joldaýynda bilim berý salasyna da erekshe nazar aýdarylǵany belgili. Sonyń ishinde jańartylǵan bilim berý mazmuny boıynsha oqýdan ótken muǵalimderdiń jalaqysy 30-50 paıyzǵa kóterilmek. Bul da - úlken qoldaý.

«Bizder de óz tarapymyzdan muǵalimderdiń biliktiligin odan ári arttyrý máselesine mán beremiz. Sondaı-aq mektepterdiń materıaldyq-tehnıkalyq jaǵynan qamtamasyz etilýi udaıy nazarda. Oblys boıynsha aýyldarda 223 shaǵyn jınaqtalǵan mektep bar. Bıyl Elbasynyń tsıfrlandyrý jónindegi tapsyrmasyna sáıkes sol bilim oshaqtaryn sapaly elektrondy kontentpen qamtıtyn bolamyz. Bul óz kezeginde qala men aýyl mektebindegi aıyrmashylyqty azaıtýǵa septigin tıgizedi.  Bilimdi urpaq - eldiń bolashaǵy. Táýelsizdigimizdi nyǵaıtyp, alǵa aparatyn da búgingi oqýshylar. Sondyqtan memleket bul oraıda barlyq múmkindikti jasap otyr», dedi Altaı Kólginov.
 

Jańa mektepte oqýshylardyń jan-jaqty bilim alýyna tolyq jaǵdaı jasalǵan. Onda 56 kabınetke qosa kitaphana, qos sheberhana, eki sport zaly, 200 oryndyq akt zaly jáne 130 oryndyq ashana bar.

Sońǵy jyldary Oral qalasynyń halqy kóbeıip keledi. Budan on jyl buryn 220 myńdaı bolsa, qazirgi kezde turǵyndar sany 300 myńnan asty. Soǵan sáıkes balalar da kóbeıýde. Qazirgi kezde oqýshylar sany 48 myńǵa jetse, sonyń 2900-i bıylǵy oqý jylynda qosylyp otyr.
 

Aıta keteıik, oblysta Aqjaıyq, Bórli jáne Qaztalov aýdandarynda da bilim berý nysandary salynýda.