Oral qalasynda jańa mektep ǵımaraty ashyldy

ORAL. QazAqparat - Oral qalasynda Táýelsizdiktiń 30 jyldyǵy aıasynda jańa mektep ǵımaraty paıdalanýǵa berildi, dep habarlaıdy QazAqparat tilshisi.

Elimizde sońǵy jyldary apatty jaǵdaıdaǵy mektepter máselesin sheshýge memleket tarapynan aıryqsha kóńil bólinip kele jatqany málim.

Osyǵan oraı «100 mektep baǵdarlamasy» aıasynda apatty jaǵdaıdaǵy 33-orta mekteptiń ornynda jańa ǵımarat boı kóterdi.

Mekteptiń ashylý rásimine qatysqan oblys ákimi Ǵalı Esqalıev jınalǵan jurtshylyqty Jańa jyl merekesi jáne osynaý qýanyshpen quttyqtap, 1935 jyly salynǵan eski ǵımarat buzylyp, ornyna jańasy turǵyzylǵanyn atap ótti.

Óńir basshysy pandemııaǵa, qurylys materıaldarynyń qyıbattaýyna qaramastan, nysandy ýaqtyly tapsyrǵan merdiger uıym «NurKapStroıGaz» kompanııasyna rızashylyǵyn bildirdi.

Oblys basshysy atynan mektepke ınteraktıvti panel tartý etildi.

Jańa mektep ǵımaratynda 17 kabınet ınteraktıvti taqtamen jabdyqtalǵan. Barlyq oqý kabınetteri ınternetke qosylǵan. Hımııa, bıologııa, fızıka kabınetteri tsıfrlyq zerthanalarmen jabdyqtalǵan, robot tehnıkasy, horeografııa kabıneti, Smart bólmeleri bar.

Sondaı-aq 20 oryndyq oqý zaly bar mektep kitaphanasy, 70 oryndyq akt zaly jumys isteıdi.