Oral qalasynda zeınetkerdi jábirlegen buzaqylar ustaldy
ASTANA. Shildeniń 14-i. QazAqparat - Buzaqy balalar túnniń ortasynda zeınetkerdiń úıine kirip, aqshasyn alyp ketken, dep habarlady BQO ІІD baspasóz qyzmetinen Gúlshat Moldaǵalıeva.
2010 jylǵy shildeniń 11-inde túngi saǵat 03.00-der shamasynda belgisiz eki adam mas kúıinde Oral qalasyndaǵy Neftebaza kóshesinde ornalasqan úılerdiń birine urlyqqa túsedi. Úıdiń terezesin kirpish taspen syndyryp, baǵaly zattardy urlamaq bolady. Osy mezette úı ıesi 84 jasar L. úıde shyqqan daýystan oıanyp ketip, bólmesinen dálizge shyqsa, úıdi tonap jatqan eki belgisiz adamdy kóredi. Shoshyp ketken ol, bólmesine qaıta kirip, tósegine baryp búrkenip jatyp alady. Úı ıesiniń bólmesine qashyp kirgenin kórip qoıǵan urylar artynan tura júgirip, bólmedegi zeınetker aıqaılap kórshileri polıtsııaǵa habarlasyp qoımasyn dep, moınynan qylǵyndyrady. Qala berdi zeınetkerdiń úni shyqpas úshin jastyqpen tunshyqtyryp, kereýettiń janynda turǵan bólmeshamyn qolyna alyp, ura bastaıdy. Keıýana janyn saqtap qalý úshin «ne kerek?» dep suraıdy. Álgi ekeýi osy kezde urýyn toqtatyp, baǵaly zattaryn berýin talap etedi. Zeınetker emdelýge saqtap júrgen 20 000 teńge aqshasy men MR3 pleerin ustata salady. Aqsha men pleerdi alǵan qaraqshylar tez arada úıden shyǵyp, boı tasalaıdy. Zeınetker kóp ýaqyt ótkizbeı polıtsııaǵa habarlasyp, bolǵan jaıtty jaıyp salady. Osy kezde bolǵan qylmysty shuǵyl izdestirýge kirisken tártip saqshylary jasy kámeletke tolmaǵan eki balany qolǵa túsirdi. Onyń biri balalar úıiniń tárbıelenýshisi bolsa, al ekinshisi buzaqylyqtan qur júrmegen bolyp shyqty.
Qazirgi ýaqytta olardyń ústinen QR QK 179 babynyń 2 bólimi a, v, g tarmaqtary boıynsha is qozǵalyp, ýaqytsha oqshaýlaý abaqtysyna qamaýǵa alyndy.
