Oral qalasynda turǵyn úı naryǵynda ózgeris baıqalmaıdy - sarapshy
ORAL. QazAqparat - Oral qalasynda turǵyn úı naryǵynda sońǵy jarty jylda baǵa ózgere qoıǵan joq. Bul týraly «Kontakt» jyljymaıtyn múlik agenttiginiń dırektory Saılaýbek Esqalıev málim etti, dep habarlaıdy «QazAqparat» HAA tilshisi.
Onyń aıtýynsha, shaharda bir bólmeli páter quny 4,7 mln. teńgeden bastalady. Eki bólmeli páter 6 mln. teńge, úsh bólmeli páter 8 mln. teńgeden aýdanyna qaraı joǵarylaı beredi. Ótimdisi - bir jáne eki bólmeli páterler. Úı satyp alatyndardyń basym kópshiligi ekinshi deńgeıli bankter arqyly ıpotekaǵa rásimdeıdi. Úı baǵasy qalypty. Árıne, eger bireýler shuǵyl kóshetin bolyp jatsa, baǵasyn túsirýi múmkin.
Jeke turǵyn úıler jóninde aıtý qıyn. Óıtkeni olarda bir úlgidegi joba joq, árkim ózinshe salady. Sondyqtan olarǵa suranys kóp emes.
Al memlekettik baǵdarlamalar aıasynda jalǵa alýshylarǵa, «Qazaqstan turǵyn úı qurylys jınaq banki» salymshylaryna arnalyp salynyp jatqan kóp páterlik úılerdiń berilýi baǵaǵa belgili bir dárejede áser etýi de múmkin. Sebebi qaıtalama naryqtaǵy úı satyp alamyn deýshilerdiń birqatary soǵan ketedi. Onda páterdiń ár sharshy metriniń quny arzandaý, 140 myń teńgeden keledi deýge bolady. Qaıtalama naryqtaǵy úı baǵasynyń ár sharshy metri 145-150 myń, 160 myń teńge shamasynda. Ekinshi jaǵynan, eger páterdi satyp alyp, ishki jóndeý jumystaryn júrgizýge týra keletin bolsa, shyǵyn da kóbeıip ketýi yqtımal. Onyń ústine jańa úılerde páter alańy keńdeý. Mysaly, olarda eki bólmeli páter aýmaǵy 60 sharshy metr bolsa, bylaıǵy sondaı páterler 44-45 sharshy metrden aspaıdy.
Sarapshynyń pikirinshe, dollar baǵamy páter baǵasyna áser etpeıdi. Óıtkeni bir jyldan beri agenttikter tek teńgemen jumys jasaýda. Bankter teńgemen rásimdeıdi. Bári qalypty, agenttikke júginýshiler de azaıǵan emes. Keıbireýler ózdiginen jarnama berip, sonymen qosa agenttikke senim bildiredi. Bul jerde aıtarymyz, jeke júremin dep, aldanyp qalmaý kerek. Qazir ǵalamtor arqyly páterdi arzan baǵasyna qoıyp, qarmaq salatyndar bar. ıAǵnı olar sheteldemin nemese basqa jerdemin dep, aldyn ala aqshasyn QIWI-ámııan arqyly tóleýdi, ıá bolmasa esepshotqa aýdarýdy usynady. Sodan keıin ushty-kúıli joq bolyp ketedi. Bul da - alaıaqtyqtyń bir túri. Sondyqtan úıdiń ıesimen jolyǵyp, keliskennen keıin aldyn ala aqshany tólegen kezdiń ózinde notarıýs arqyly, zańdy jolmen rásimdegen durys.
Páterlerdi jalǵa berý jaıyn da qozǵaı ketsek, onyń aqysy maýsymǵa baılanysty. Máselen, kúzde stýdentter kelgen kezde kóterilýi múmkin. Al ýaqytsha tirkeý ázirge áser etip jatqan joq.
Kórshiles Aqtóbe, Atyraý jáne Aqtaý qalalarymen salystyrǵanda, Oralda úı baǵasy arzan.
«Aldaǵy alty aıda úı baǵasynda ózgeris bolmaıdy dep oılaımyn», - dep túıindedi oıyn S.Esqalıev.
«Kontakt» agenttiginiń jumys jasaǵanyna onshaqty jyldyń júzi bolsa, mundaı mekemeler sany onnan asady. Sonyń biri «DE LUXE» páter bıýrosynyń rıeltory Rýslan Shaıhıevtiń sózine qaraǵanda, páter quny onyń ıeleriniń qoıǵan baǵasyna baılanysty bolyp keledi. Bireý qalanyń ortalyǵyndaǵy bir bólmeli páterin 7 mln. teńgege baǵalasa, ekinshisi eki bólmeli úıin sondaı baǵaǵa ótkizgisi kelýi múmkin. Sosyn aýdanyna, úıdiń eski-jańasyna, basqa da jaǵdaılaryna baılanysty. Taǵy bir aıta ketetin jaıt, qazir bir bólmeli páter ortalyqta shamamen 45-50 myń teńgeden, eki bólmelisi 50 myńnan, úsh bólmelisi 60 myń teńgeden jalǵa berilýde. Páter jaqsy, jan-jaqty jaǵdaıy bar, jóndelgen bolsa, onda qymbattaı túsedi. Ýaqytsha tirkeýdi páterdi zańdy túrde jalǵa berýshiler qıynsynyp otyrǵan joq.
