Oral qalasynda turǵyn úı qurylysyna 5 mlrd. teńge jumsaldy

Qala ákimdiginen túsken málimetke qaraǵanda, bul - ınvestıtsııanyń 18 paıyzy. Ótken jyly jergilikti bıýdjet esebinen «Soltústik-shyǵys» yqshamaýdanynda jalpy alańy 15 myń sharshy metr 240 páterlik turǵyn úı paıdalanýǵa berildi. Oǵan Uly Otan soǵysy ardagerleri, jetimder, kóp balaly otbasylar, múgedekter, basqa da az qamtylǵan azamattar qonystandy.

«100 mektep, 100 aýrýhana» memlekettik baǵdarlamasy aıasynda jáne jalǵa beriletin páterler retinde «Jańa orda» yqshamaýdanynda 16 myń sharshy metr 128 páterlik jáne 75 páterlik qos úı iske qosyldy. «Jas otaý» baǵdarlamasyna sáıkes jas otbasylarǵa arnalǵan 90 páterlik úı salyndy.

Turǵyn úı salý úshin jer telimin alý kezeginde 51671 adam tur. Osy máseleni sheshý maqsatynda QR Úkimetiniń qaýlysymen Zelenov jáne Terekti aýdandarynyń bir bóligi qala aýmaǵyna jatqyzyldy. Bas josparǵa sáıkes qalany batys (Derkól kentine qaraı) jáne soltústik-shyǵys jaǵyna (Trekın, Novenkıı aýyldaryna) qaraı damytý kózdelip otyr. Qazirgi kezde Derkól kentinen 1300 jer telimin berý jumystary júrgizilýde.