Oral qalasynda tórt emhana karantınge jabyldy
ORAL. QazAqparat – Oral qalasynda tórt emhana karantınge jabyldy, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, Oral qalalyq bas memlekettik sanıtarynyń qaýlysyna sáıkes №2, №3, №4 jáne №5 emhanada ýaqytsha karantın jarııalandy.
«Bul mekemelerge koronavırýs juqtyrǵan naýqastar kelip, qyzmetine júgingen. Qazirgi ýaqytta zalalsyzdandyrý jumystary tolyqtaı júrgizildi. Emhana qyzmetkerlerinen alynǵan test teris nátıje kórsetken jaǵdaıda atalǵan mekemeler qaıta ashylatyn bolady. Degenmen jedel járdem mekenjaılar boıynsha qyzmet jasaı beredi», dedi N.Mustaev.
Oblysta barlyǵy 93 aýrý oshaǵy tirkelip, naýqastarmen 1115 adamnyń, sonyń ishinde 597-siniń jaqyn baılanysta bolǵany anyqtaldy.
Óńirde indetke qarsy kúres jalǵasýda. Oblysta 414 naýqas anyqtalsa, sonyń 377-si Oral qalasynyń úlesine tıedi.
Eske sala keteıik, budan buryn BQO-nyń eki balabaqshasynda 2 qyzmetkerden koronavırýs anyqtalǵanyn jazǵan bolatynbyz.
