Oral qalasynda sońǵy eki kúnde 6400 tekshe metrden astam qar shyǵaryldy
Oral qalasy ákiminiń baspasóz qyzmetinen málim etkenindeı, keshe shahar 3780, 17 aqpanǵa qaraǵan túni 2616 tekshe metr qardan tazartyldy.
Qys bastalǵaly beri qaladan barlyǵy 60 myń tekshe metrge jýyq qar shyǵaryldy.
Óńirde buǵan deıin kópten qar jaýmaǵan edi. Esesine sońǵy kúnderi qar kóp tústi. Soǵan baılanysty «Jaıyq taza qala» JShS-nyń kúshteri (171 tehnıka) osy jumystarǵa jumyldyryldy.
Qazirgi tańda oblys ortalyǵynda kósheler men joldardy tazalaý jalǵasýda.
«Qazgıdromet» RMK BQO fılıaly meteoboljamdar bóliminiń bastyǵy Dınara Ospanovanyń aıtýynsha, sońǵy eki kúnde 14 mıllımetr qar jaýdy. Jaýyn-shashynnyń aılyq mólsheri 21 mm bolsa, aqpan aıynyń 17 kúninde 20,3 mm qar tústi.
Onyń sózine qaraǵanda, osyndaı aýa raıy aldaǵy kúnderi de jalǵasady.
«18-24 aqpanda oblys aýmaǵynda qar jaýady. Ásirese, 22 aqpan kúni kúndiz oblystyń soltústiginde jáne Oral qalasynda qar kóp túsedi. 19-24 aqpanda jaıaý burqasyn kóterilip, 20-synda oblystyń batysy men ońtústiginde kóktaıǵaq bolady. Aýa temperatýrasy qalypty deýge bolady, qatty aıaz joq. Kóp jyldyq málimetter boıynsha 17 aqpanda eń jyly kún (2,2 gradýs) 1978 jyly tirkeldi. Al eń sýyq kún (-34,0) 1951 jyly bolǵan», dedi QazAqparat tilshisine D. Ospanova.
Foto – Oral qalasy ákimdigi
