Oral qalasynda órtke baılanysty tirkeý jáne jer kadastry bóliminiń mekenjaıy ózgerdi
QazAqparat budan buryn habarlaǵanyndaı, 30 jeltoqsanda «Azamattarǵa arnalǵan úkimet» memlekettik korporatsııasy BQO boıynsha fılıaly Oral qalalyq tirkeý jáne jer kadastry bóliminiń ǵımaratynda órt bolǵan edi. Órttiń shyǵý sebebin tıisti organdar anyqtaıtyn bolady.
«Órt sóndirýshilerdiń jedel áreket etýiniń nátıjesinde qysqa ýaqyt ishinde «tilsiz jaý» aýyzdyqtalyp, adam shyǵyny bolmaı, qujattarǵa da zaqym kelgen joq. Barlyq qolda bar aqparat pen klıentterdiń ótinimderi saqtaldy», – dedi «Azamattarǵa arnalǵan úkimet» memlekettik korporatsııasy BQO boıynsha fılıaly dırektorynyń orynbasary Bekzat Orazalın.
«Azamattarǵa arnalǵan úkimet» memlekettik korporatsııasy BQO boıynsha fılıalynyń baspasóz qyzmetinen málim etkenindeı, qalalyq tirkeý jáne jer kadastry bólimi ýaqytsha M. Júnisov kóshesi, 96 mekenjaıyna kóshirildi. Jumys kestesi dúısenbiden jumaǵa deıin 09.00-den 18.30-ǵa deıin.