Oral qalasynda orman aýmaǵyndaǵy órt sóndirildi
ORAL. QazAqparat – Oralda Basqaq toǵaıy aýmaǵyndaǵy órt sóndirildi, dep habarlaıdy QazAqparat tilshisi.
BQO TJD baspasóz qyzmetinen málim etkenindeı, eki kúnge ulasqan «tilsiz jaý» 21 sáýir kúni saǵat 21:13-te tolyqtaı aýyzdyqtaldy.
Orman aýmaǵyndaǵy qurǵaq shóptiń órtenip jatqany jóninde 20 sáýir kúni saǵat 14:21-de habar túsken edi. Keıin órttiń 70 gektar aýmaqty (55 gektary – qurǵaq shóp, 15 gektary – orman ekpeleri) qamtyǵany belgili boldy.
«Órtti sóndirýge BQO TJD-den, Oral orman jáne janýarlar dúnıesin qorǵaý kommýnaldyq memlekettik mekemesinen barlyǵy 92 adam (18 tehnıka, 1 qaıyq, 4 motopompa) jumyldyryldy. Zardap shekkender joq. Qazirgi kezde jaǵdaı turaqty. Qaýip seıildi», - dep habarlady vedomstvodan.
Eske sala keteıik, budan buryn Oral qalasynda qurǵaq shóptiń órtenýine baılanysty jedel shtab qurylǵanyn jazǵan bolatynbyz.
Sondaı-aq, Oralda toǵaı aýmaǵyndaǵy órt 70 gektardy qamtydy.
