Oral qalasynda qaı kóshelerdiń jóndeletini belgili boldy
Qala ákimi Abat Shynybekovtiń málim etkenindeı, áleýmettik-ekonomıkalyq turǵydan mańyzdy sanalatyn Ábilqaıyr han dańǵyly men M.Sholohov kóshelerin retke keltirý kún tártibinde tur.
Onyń sózine qaraǵanda, bul kósheler osydan 15-20 jyl buryn kúrdeli jáne ortasha jóndeýden ótken.
Jyl saıyn jol qozǵalysy qaýipsizdigin qamtamasyz etý úshin aǵymdaǵy jóndeý jumystary júrgizilgenimen, ol jetkiliksiz bolyp otyr.
«2021 jyly Oral qalasy ákimdigi Ábilqaıyr han dańǵylyn ortasha jáne M.Sholohov kóshesin kúrdeli jóndeý úshin jobalyq-smetalyq qujattama daıyndap, saraptamanyń oń qorytyndysyn aldy. Negizgi basymdyq Ábilqaıyr han dańǵylyna berilip otyr. Konkýrstyq jumystar aıaqtalǵannan keıin dańǵyldy jóndeý jumystary bastalady. Al M.Sholohov kóshesin jóndeý úshin qarjylandyrý máselesi qarastyrylýda», dedi A.Shynybekov.
Oǵan qosa Derkól kentindegi «Saryarqa» shaǵynaýdanynda uzyndyǵy 16,3 shaqyrym bolatyn 18 kóshege jol salýǵa 1 mlrd teńge bólindi. Barlyq qajetti materıal daıyn, aýa raıynyń qolaıly kezinde jol salý bastalady.
Zachagan kentinde bıyl Dáýqara batyr jáne Ǵ.Musaǵalıev kóshelerin kúrdeli jóndeý josparlanyp otyr. Osy kenttegi 25-Chapaev dıvızııasy kóshesinde byltyr bastalǵan kúrdeli jóndeý jumysy bıyl márege jetedi.
Sonymen qatar qaladaǵy avtomobıl jolyn qaıta qurý jáne kúrdeli jóndeý maqsatynda 21 joba ázirlenip, saraptamanyń oń qorytyndysy alyndy.
Sondaı-aq qala kóshelerin aǵymdaǵy jóndeýge bıyl 316 mln astam teńge qaraldy.
Qala ákimdiginen túsken málimetke qaraǵanda, Ábilqaıyr han dańǵylyn ortasha jóndeý boıynsha jobanyń smetalyq quny – 646,118 mln teńge. Joba boıynsha D.Karbyshev kóshesinen S.Datuly kóshesine deıin asfaltbeton jabynyn jáne jıektastardy tolyq qaıtadan salý qarastyrylǵan.
M.Sholohov kóshesin kúrdeli jóndegen kezde jol keńeıtilip, alty jolaqtyǵa aınalady, basqa da jumystar jasalady. Munyń jalpy quny – 4,2 mlrd teńge. Bul joba eki jylǵa eseptelgen.