Oral qalasynda eriktiler 40 myń maskany tegin taratty

ORAL. QazAqparat – Oral qalasynda eriktiler búgin 40 myń medıtsınalyq maskany tegin taratty, dep habarlaıdy QazAqparat tilshisi.

BQO jastar saıasaty máseleleri jónindegi basqarmanyń qoldaýymen «Jaqynyńa janashyr bol! Maska taǵaıyq!» sharasy aıasynda úlestirilgen ár qoraptyń ishinde 3 dana medıtsınalyq maska bar.

Shahardyń volonter qyz-jigitteri 23 shilde kúni «Jasyl el» shtabynda jınalyp, 40 myń maskany qabyldap aldy. Arnaıy qorǵanysh kıimin kıgen eriktilerdiń bir bóligi maskalardy shaǵyn qoraptarǵa salsa, ekinshi top aldyn ala daıyndalǵan arnaıy kólikterge tıedi.

«Oral jastary» qozǵalysynyń volonteri Dýlat Júsipqalıevtiń aıtýynsha, árkim koronavırýs qateriniń seıilmegenin jete túsinip, qorǵaný quraldarynyń ınfektsııanyń taralýyn azaıtýǵa septigin tıgizetinin uǵynýy mańyzdy.

«Karantın ýaqytynda, ókinishke qaraı, keıbir azamattar qarapaıym saqtyq sharalaryn eskermeıdi. Qoǵamdyq oryndarda, kóshelerde serýendeý kezinde medıtsınalyq maska taqpaıdy, araqashyqtyqty saqtamaıdy. Sondyqtan túrli sebeptermen betperdesiz júrgen qala turǵyndaryna eriktiler saqtyq sharalaryn eske sala otyryp, medıtsınalyq maskalar men únparaqtar usyndy. Mundaı jumystar oblystyń barlyq aýdandarynda júrgizilýde», dedi D.Júsipqalıev.

Sharaǵa 150-den astam «Jasyl el» sarbazdary, «Oral jastary», «Aqjaıyq jastary» volonterleri atsalysty.

Eske sala keteıik, budan buryn Oralda dárihanalarda joq dárilerdi zańsyz satqan turǵynnyń jaýapqa tartylǵanyn jazǵan bolatynbyz.