Oral qalasynda bıyl jol apattarynan 26 adam kóz jumdy
ORAL. QazAqparat - Oral qalasynda bıylǵy on aıda 199 jol-kólik oqıǵasy tirkelip, sonyń saldarynan 26 adam kóz jumyp, 213-i túrli jaraqat aldy, dep habarlaıdy «QazAqparat» tilshisi.
Oral qalalyq ishki ister basqarmasynyń baspasóz qyzmetkeri Gúlaman Ismaǵulovanyń aıtýynsha, saraptama kórsetkenindeı, ár jol apatynyń úshinshisi kólik júrgizýshileriniń jyldamdyqty shekten tys arttyrýy saldarynan oryn aldy. Osy quqyq buzýshylyqqa barǵan kólik ıelerine 1 957 ákimshilik hattama toltyryldy. Baǵdarshamnyń ruqsat etilmegen belgisine toqtamaǵan 678 júrgizýshi jaýapqa tartyldy. Jaıaý júrginshiler de qarap qalyp jatqan joq. Olardyń tarapynan 2 135 ereje buzý deregi anyqtalyp, tıisti shara alyndy. 99 kólik joldyń qarsy betine shyǵyp ketip, apatty jaǵdaıdyń qalyptasýyna sebepker boldy.
Jaıaý júrginshilerdi ótkizbegen 517 kólik ıesine aıyppul salyndy, bul ótken jylǵy osy kezeńdegiden (409) 26,4 paıyzǵa ósip otyr. Mundaı quqyqbuzýshylyq qarasha aıynda da jalǵasýda. Mysaly, 2 qarasha kúni eki, 4 qarashada osyndaı bes derek tirkeldi.
2 qarasha kúni saǵat 17.15-te 1974 jylǵy júrgizýshi «Folksvagen Passat» avtokóligimen velosıpedpen ketip bara jatqan adamdy qaqty. Sonyń saldarynan jabyq túrde bas súıegi men mıy, mańdaıynan jaraqat alǵan velosıpedshi aýrýhanaǵa jatqyzyldy. Sol kúni saǵat 23.50-de Zelenov aýdanynyń 1994 jylǵy turǵyny «Sıat» kóligimen Oral-Jelaev tas jolynda Jelaev aýylynda turatyn 1937 jylǵy zeınetkerdi qaǵyp ketti. Mıyna zaqym kelip, dene músheleri synǵan turǵyn qazir qalalyq kóp beıindi aýrýhanada em qabyldaýda. 4 qarasha kúni saǵat 20.30-da 1993 jylǵy kólik ıesi Sholohov kóshesindegi «Baký» kafesine qarsy bette 1980 jylǵy jaıaý júrginshini qaǵyp, bul azamattyń sol aıaǵynyń súıekteri syndy. Oǵan da dárigerlik kómek kórsetildi.
