Oral qalasynda bes qabatty úıden órt shyqty

ORAL. QazAqparat – Oral qalasynda bes qabatty úıden órt shyqty, dep habarlaıdy QazAqparat tilshisi.

BQO tótenshe jaǵdaılar departamentiniń baspasóz qyzmetinen málim etkendeı, oqıǵa 11 maýsym kúni Zachagan kenti Temirtaý kóshesi 19-mekenjaıynda bolǵan.

«Saǵat 11.32-de ekinshi qabatta balkon janyp, jalyn jatynjaı bólmesine aýysyp, jeke zattar, jıhaz otqa orandy. Órttiń aýmaǵy 20 sharshy metrdi qamtydy. Páterdiń ıesi – 88 jastaǵy keıýana. Joǵary jáne tómengi qabattardan 18 adam ózderi úıden shyqqan, olardyń úsheýi – bala. Zardap shekkender joq. Órtti sóndirýge 18 adam 5 tehnıkamen qatysty. «Tilsiz jaý» saǵat 11.51-de oqshaýlanyp, 12.13-te aýyzdyqtaldy», dep habarlady vedomstvodan.

Eske sala keteıik, budan buryn Oral qalasynda «Báıterek» jabyq bazary órtenip jatqanyn jazǵan bolatynbyz.