Oral qalasynda bes birdeı jer telimi aýktsıonǵa qoıyldy
Oral qalalyq jer qatynastary bóliminen túsken málimetke qaraǵanda, kommertsııalyq baǵyttaǵy nysandar qurylysy úshin jer telimderin jaldaý quqyǵyn satý boıynsha aýktsıon 31 qańtarda ótpekshi. Aǵylshyndyq ádispen ótetin aýktsıonǵa qalanyń ózinen úsh, sondaı-aq Zachagan men Krýgloozernyı kentterinen bir-birden jer telimi shyǵarylyp otyr.
Bólim basshysy Arman Bısembalıevtiń aıtýynsha, 2017 jyly osyndaı eki aýktsıon uıymdastyrylǵan bolatyn. Mamyr aıynda ótken aýktsıonǵa segiz jer telimi (tórteýi Krýgloozernyıdan, jartysy Derkólden) qoıylyp, 15 adam qatysty. Aýktsıonnan 5,2 mln teńge tústi. Kúni búgin bir kásipker óziniń jer teliminde dúken salyp úlgerse, qalǵandary da jumystanýda.
Jeltoqsan aıynda ótken aýktsıon oǵan qatysýshylardyń kóbeıe túskendigin kórsetti. Bes jer teliminiń tórteýi boıynsha 29 adam ótinish bildirip, sonyń 21-i baq synady. Bul jer telimderiniń quny 20,430 mln teńgege jetti. Sonyń ishinde bir jer telimin oraldyq kásipker 16 mln teńgege satyp aldy. Bir lot boıynsha jalǵyz adam túskendikten, ol ótpegen bolyp sanaldy.
Eske sala keteıik, eger satyp alýshylar jer telimin úsh jyl maqsatty túrde paıdalanbaǵan jaǵdaıda QR Jer kodeksiniń 92 jáne 94-baptaryna sáıkes keri qaıtarylady. Jalǵa alý quqyǵynyń úsh jyldyq merzimi bitken soń kásipker jer teliminiń kadastrlyq qunyn qosa tólep, óz menshigine aýdara alady.
