Oral qalasynda balabaqshalardyń jumysy qaıta toqtatyldy
Buǵan deıin habarlaǵanymyzdaı, BQO taýarlar men kórsetiletin qyzmetterdiń sapasy men qaýipsizdigin baqylaý departamenti óńirde koronavırýsqa shaldyǵý deńgeıiniń tómendemeýine baılanysty karantın merzimin 15 maýsymǵa deıin uzartqan bolatyn.
Qalalyq bilim berý bóliminen túsken málimetke qaraǵanda, jaǵdaıdyń kúrdeliligin eskere otyryp, balalardyń qaýipsizdigi úshin qala ákimdigi janyndaǵy jedel shtabtyń 24 mamyrdaǵy otyrysy negizinde karantın rejımi aıaqtalǵansha barlyq menshik túrindegi balabaqshalardyń qyzmetin toqtatý týraly sheshim qabyldandy.
Bólim basshysy Aqjarqyn Temirhanovanyń aıtýynsha, oblys ortalyǵynda 50 balabaqsha bar. Balabaqshalar buǵan deıin 20 mamyrda qyzmetin bastap, úsh kún boıy búldirshinderdi qabyldaǵan edi.
Eske sala keteıik, búgin tańdaǵy málimet boıynsha Batys Qazaqstan oblysynda taǵy 16 adam koronavırýs juqtyryp, ósim deńgeıi 4,3 paıyzdy qurady.