Oral qalasynda azamattardy turǵyn úı kezeginen shyǵarý, páter bólý tóńireginde shý shyqty
BQO sybaılas jemqorlyqqa qarsy qyzmetinen málim etkenindeı, atalmysh mekeme júrgizgen monıtorıng nátıjesinde anyqtalǵanyndaı, 189 adam turǵyn úı kezeginen negizsiz shyǵarylǵan.
Sonymen qatar 169 adamǵa kezektilik tártibi saqtalmaı, úı berilgen.
«Sondaı-aq jeke menshiginde turǵyn úıi bar jáne basqa da negizder boıynsha esepte negizsiz turýdyń 1460, turǵyn úıge muqtajdar kezeginde turmaıtyn adamdarǵa turǵyn úı berýdiń 247 deregi anyqtaldy. Jeke qordan turǵyn úı berýge arnalǵan 131,765 mln teńge kóleminde bıýdjet qarajaty tıimsiz paıdalanylǵan. Memlekettik turǵyn úı qorynan turǵyn úıdi tómendetilgen qunmen jekeshelendirýdiń 115 deregi oryn alyp, sonyń saldarynan memleketke 16 mln teńgeden astam somaǵa zalal keltirildi», dep habarlady vedomstvodan.
Osyǵan oraı Oral qalasy ákiminiń orynbasary Mıras Múlkáı men Oral qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń orynbasary Qanat Ómirálıevtiń qatysýymen arnaıy brıfıng ótkizildi.
Qala ákimdiginiń ókilderi «Turǵyn úı qatynastary týraly» Qazaqstan Respýblıkasynyń 1997 jylǵy 16 sáýirdegi №94 Zańyn negizge ala otyryp, QR Sybaılas jemqorlyqqa qarsy is-qımyl agenttigi BQO boıynsha departamenti júrgizgen monıtorıng qorytyndysy boıynsha turǵyn úı kezeginen 189 emes, 55 azamattyń shyǵarylǵany anyqtalǵanyn málimdedi.
Q.Ómirálıevtiń túsindirýinshe, atalǵan Zańda belgilengen tártippen turǵynjaıǵa muqtaj dep tanylǵan jáne esepke qoıylǵan jetim balalar jáne ata-anasynyń qamqorlyǵynsyz qalǵan balalar, tolyq emes otbasylar, «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, sondaı-aq I jáne II dárejeli «Ana dańqy» ordenderimen nagradtalǵan kópbalaly analar, kópbalaly otbasylar turǵynjaı alǵanǵa deıin esepten shyǵaryp tastaýǵa jatpaıdy.
Alaıda osy másele boıynsha Qazaqstan Respýblıkasy Indýstrııa jáne ınfraqurylymdyq damý birinshi vıtse-mınstri Q.Óskenbaevtiń 2020 jylǵy haty negizinde jetim balalar, tolyq emes otbasylary, kópbalaly otbasylardy esepten shyǵarmaý jónindegi kórsetilgen norma atalǵan sanattardaǵy balalar kámeletke tolǵan kezde qoldanylady dep habardar etken edi. Bul rette, eger osy tarmaqtyń 1-5 tarmaqshalarynda kórsetilgen fakt atap aıtqanda: menshiginde turǵyn úıdiń bolýy, turaqty tirkeýdiń bolmaýy rastalsa, kórsetilgen sanattardaǵy otbasylar esepten shyǵarýǵa jatady dep habardar etken bolatyn. Turǵyndar osyndaı sebeptermen esepten shyǵaryldy.
«247 azamatqa zańsyz páter berilgen degenge baılanysty aıtarymyz, qyzmettik turǵyn úıler qyzmet babymen aýysyp kelgen qyzmetkerlerge berilýde. Mysalǵa: densaýlyq saqtaý salasy boıynsha 100 dárigerge jáne quqyq qorǵaý organdarynda qyzmet atqaratyn 73 adamǵa qyzmettik páterler berilgen. Osyǵan baılanysty zań buzýshylyq bul arada oryn alǵan joq», dedi Q.Ómirálıev.
Onyń sózine qaraǵanda, sol sekildi 169 adamǵa turǵyn úı komıssııanyń sheshimimen berilgen. Sebebi, turǵyn úı kezegimen páter bergen kezde, kezekte turǵan kópbalaly otbasylardyń menshiginde turǵynjaılary bolǵandyqtan, komıssııa sheshimimen páter bólýden bas tartylyp, kezekte qaldyrý jóninde sheshim shyǵarylǵan. Sosyn kezek boıynsha keıin turǵan otbasylardyń qujattary zańǵa sáıkes kelgendikten, páter berilgen. Sondyqtan bul arada 169 azamatqa kezeksiz páter berildi degen másele zańǵa qaıshy keledi.
Myńnan astam adamnyń turǵyn úı kezeginde zańsyz turýy boıynsha Q.Ómirálıev bylaı dedi: 2018 jyly – 392, 2019 jyly – 601, 2020 jyly – 338, 2021 jyly 118 adam kezekten shyǵaryldy.
«Búgingi tańda turǵyn úıge muqtajdar kezeginde 22 524 adam tur. Turǵyn úı kezegine qoıý qaǵıdasyna jáne QR Turǵyn úı qatynastary týraly Zańyna sáıkes jyl saıyn túgendeý jumysy júrgizilýi tıis. 2020-2021 jyl aralyǵynda barlyq oblys boıynsha (qala, aýdan) otbasy quramyna qosý, ózgeris engizý boıynsha buıryqtar túgeldeı oryndalmaýyna baılanysty, túgendeý jumysy júıede qosylmaǵandyqtan, oryndalǵan joq. Kezekte.kz jańa bazasy engizilýine oraı jáne osy bazamen bıylǵy jyldyń naýryz aıynan bastap jumystanýymyzǵa baılanysty, túgendeý isi bastalǵan joq. Kúni búgin bazada túgendeý jumysynda ózgeris engizilgen, endi túgendeý jumysy barysynda «Jeke málimetter» Zańyna sáıkes, jumys barysynda turǵyn úı kezeginde turǵan azamattarǵa SMS habarlamasy jiberiledi, ol habarlamaǵa ol ruqsatyn bergen ýaqytta ǵana málimetter alynyp, túgendeý jumysy oryndalady», dedi ákimdik ókili.
Batys Qazaqstan oblysynyń ákimi Ǵalı Esqalıev Facebook-tegi paraqshasynda BAQ-ta kórsetilgen zańbuzýshylyq derekteri oryn alsa, jaýapty laýazymdy tulǵalardyń zań aıasynda jaýapkershilikke tartylatynyn jetkizdi.
