Oral qalasynda avtobýstyń ústine aǵash qulady
BQO TJ departamentiniń baspasóz qyzmetinen málim etkendeı, oqıǵa 10 shilde kúni Saraıshyq kóshesinde boldy.
Saǵat 13.45-te №2 baǵytpen júretin avtobýstyń ústine aǵash qulaǵan.
Oqıǵa ornyna kelgen qutqarýshylar (4 adam, 1 tehnıka) aǵashty kesip, qoǵamdyq kóliktiń ústinen túsirdi. Zardap shekkender joq.
BQO TJ departamentiniń málimeti boıynsha qolaısyz aýa raıyna baılanysty Oral qalasy aýmaǵy men oǵan jaqyn aýdandarda qurǵaq shóp pen qoqys janý derekteri jıiledi.
«Óńirde órt tutaný yqtımaldyǵy joǵary. 10 shilde kúni oblystyń batysy men soltústiginde naızaǵaı oınap, burshaq jaýýy múmkin. Al óńirdiń ońtústigi men batysynda shańdy daýyl turady. Jeldiń ekpini sekýndyna 15-20 metrge deıin jetedi. Oblysta 35-39 gradýsqa deıingi qatty ystyq saqtalady. Osyǵan baılanysty qaýipsizdik erejelerin qatań saqtap, órt oshaqtary anyqtalǵan jaǵdaıda 101 jáne 112 nómirlerine dereý telefon shalý suralady», - dep habarlady vedomstvodan.
Oral qalasynda temperatýra tili qazirgi kezde 41-42 gradýsty kórsetip tur. Oǵan kúshti jel qosylyp, shahardyń keı bólikterinde jaryq ta óship qalyp jatyr.
Eske sala keteıik, budan buryn Batys Qazaqstanda birneshe dala órti sóndirilgenin jazǵan bolatynbyz.
