Oral qalasynda avtobýstar qatynasy toqtatylady
ORAL. QazAqparat – Batys Qazaqstan oblysynda 16 sáýirden bastap karantındik shekteý sharalary kúsheıtiledi. Bul týraly brıfıngte BQO-nyń bas memlekettik sanıtary Muhamǵalı Aryspaev málim etti, dep habarlaıdy QazAqparat tilshisi.
Onyń aıtýynsha, búginnen bastap BQO bas memlekettik sanıtarlyq dárigeriniń qaýlysyna ózgerister engiziledi.
Atap aıtqanda, erteńnen bastap Oral qalasynda barlyq baǵyttaǵy avtobýstar qatynasy toqtatylady.
«Sonymen qatar oblystaǵy barlyq bank jáne poshta bólimsheleri, azyq-túlik bazarlary jabylady», dedi M.Aryspaev.
M.Aryspaev oblysta koronavırýspen aýyrǵandar sany 18-ge jetkenin, tek sońǵy táýlikte alty adamnyń tirkelgenin aıtyp, sondyqtan indetke qarsy sharalardyń kúsheıtilip otyrǵanyn atap ótti.
Eske sala keteıik, BQO-da sońǵy tirkelgen naýqastyń aýrýdy qaıdan juqtyrǵanyn jazǵan bolatynbyz.
