Oral qalasynda alaıaqtyq qylmysy jıilep ketti
ORAL. QazAqparat - Oral qalasynda sońǵy kezde alaıaqtyq jıilep otyr, dep habarlaıdy QazAqparat tilshisi.
Oral qalalyq polıtsııa basqarmasynyń baspasóz qyzmetinen túsken málimetke qaraǵanda, alaıaqtar úıińizge jıhaz jasap, ákelip beremin nemese uıaly telefonmen habarlasamyn dep, san soqtyryp ketýde.
Atap aıtqanda, esh jerde jumys jasamaıtyn 1988 jylǵy turǵyn oraldyq azamatshanyń senimine kirip, úı jıhazyn jasap beremin dep, 217 myń teńgesin jymqyryp ketken. Alaıda onyń jymysqy oıy júzege aspaı, jedel izdestirý sharalary nátıjesinde qolǵa tústi.
Sol sekildi oraldyq áıel «Kirpish zaýyty» aýdanynda 1989 jylǵy turǵynnyń «Aıfon-7» telefonyn tanysyna habarlasamyn dep surap alǵan. Aqyry oǵan 150 myń teńge shyǵyn keltirgen. Bul alaıaq ta alysqa uzaǵan joq.
Qazirgi kezde osyndaı oqıǵalar boıynsha qylmystyq ister qozǵalyp, tergeý amaldary júrgizilýde.
Aıta keteıik, bıylǵy on aıda 655 alaıaqtyq deregi tirkelip, sonyń 435-ine qatysty qylmystyq is qozǵaldy. Ótken jyly osy merzimde 709 alaıaqtyq belgili bolyp, 540 qylmystyq is qozǵalǵan bolatyn.
