Oral qalasynda 507 mln teńgege 20 aýla aýmaǵy abattandyrylýda
ORAL. QazAqparat - Oral qalasynda bıyl 507 mln. teńgege 20 aýla aýmaǵy abattandyrylýda, dep habarlaıdy «QazAqparat» tilshisi.
Qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń basshysy Baýyrjan Tuhfatovtyń sózine qaraǵanda, bul jobalardyń úsheýi ótken jylǵydan bıylǵa aýysqan. Qazirgi kezde atalmysh aýlalarda jumys 70-80 paıyzǵa oryndalǵan.
Jalpy, qalada jańadan boı kótergen shaǵynaýdandardy eseptemegende, barlyǵy 386 aýla aýmaǵy bolsa, 2007-2016 jyldary sonyń 277-si abattandyrylǵan. Qazirgi kezde atalmysh bólim mamandary taǵy 29 aýla aýmaǵyn jóndeý boıynsha jobalyq-smetalyq qujattama jasady. Aldaǵy jyly osy 29 aýlaǵa qosa 6 tynymbaqty abattandyrý kózdelýde. Bıyl qalada qos birdeı tynymbaqty retke keltirýge 166 mln teńge qaralǵan. Oblystyq aýrýhana mańyndaǵy A.Pýshkın músini turǵan tynymbaqta aǵashtar otyrǵyzylyp, órnektas tóselip, joldar jasalady, oryndyqtar qoıylady. Buǵan 53 mln teńge jumsalmaq. Sol sekildi tórtinshi jáne altynshy shaǵynaýdandar aralyǵyndaǵy tynymbaqta 113 mln teńgeniń jumystary atqarylmaq.
Shaharda barlyǵy 54 tynymbaq bolsa, sońǵy jeti jylda sonyń 30-dan astamy retke keltirilgen.
