Oral qalasynda 5 medıtsına qyzmetkeri koronavırýs juqtyryp aldy
ORAL. QazAqparat – Batys Qazaqstan oblysynda sońǵy tirkelgen 18 naýqastyń (ósim – 2,1 paıyz) barlyǵy da – Oral qalasynyń turǵyndary, dep habarlaıdy QazAqparat tilshisi.
Sonyń ishinde beseýi – medıtsına qyzmetkerleri.
Tórt naýqas buryn aýyrǵandarmen qarym-qatynasta bolǵan. 11 adamnan epıdemıologııalyq kórsetkish boıynsha, al 3 adamnan profılaktıkalyq maqsatta zerthanalyq synama alynǵan.
Naýqastardyń bári de oblystyq juqpaly aýrýlar aýrýhanasyna ornalastyryldy.
Sonymen qatar klınıkalyq belgileri joq 23 adam (3 maýsymnan osy kezge deıin barlyǵy – 215) tirkeldi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentinen alynǵan málimetke qaraǵanda, óńirde syrqattanǵandar sany 863-ke jetse, sonyń 451-i jazylyp shyqty.
Qazirgi tańda 32 adam provızorlyq, 135 adam karantındik statsıonarda jatsa, 1556 adam úılerinde oqshaýlanǵan.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, qazirgi kezde bes adamnyń jaǵdaıy óte aýyr. Eki emdelýshi jasandy tynys alý apparatyna qosylǵan. Buryn aýyr halde bolǵan 2 jasar sábıdiń jaǵdaıy jaqsaryp keledi.
Eske sala keteıik, budan buryn BQO-da koronavırýsqa shaldyqqan 7 adamnyń aýyr halde jatqanyn jazǵan bolatynbyz.
