Oral qalasyna qarasty Derkól kenti turǵynynyń turmystyq saraıynan snarıad tabyldy
ORAL. 23 aqpan. QazAqparat - 22 aqpan kúni saǵat 16.25-te №14 ýchaskelik polıtsııa beketine Derkól aýylynyń 40 jasar turǵyny habarlasyp, turmystyq saraıynda snarıadqa uqsaıtyn metaldan jasalǵan belgisiz zattyń jatqanyn aıtqan.
Aldyn ala tekserý júrgizgen polıtseıler muny dıametri 76 mm, uzyndyǵy 320 mm azamattyq soǵys kezinen qalǵan artıllerııaly snarıad dep tapqan. Oral qalalyq ishki ister basqarmasynyń qyzmetkerleri snarıad tabylǵan jerdi baqylaýǵa alyp, jol polıtsııasy basqarmasynyń qyzmetkerleri kólik júretin joldardy jaýyp, barlyq saqtyq sharalaryn qolǵa aldy. 22 aqpan kúni saǵat 19.20-da «Arlan» arnaıy maqsattaǵy bólinis jaýyngerleri Bortaý aýyly aımaǵynda snarıadty jaryp, joıdy.
