Oral qalasy tóńireginde 40 ga jer órtendi
ORAL. QazAqparat - Keshe Oral qalasy mańyndaǵy 2-saıajaı aýmaǵynda 40 ga jerde qurǵaq shóp órtendi, dep habarlaıdy «QazAqparat» tilshisi.
BQO TJ departamentiniń bas mamany, azamattyq qorǵaý kapıtany Azamat Nurpeıisovtiń aıtýynsha, sonyń saldarynan 14 elektr baǵanasyna zaqym keldi. «Avtomobılıst» saıajaı qoǵamdastyǵynda alańy 36 sharshy metr úı men sondaǵy jeke múlikter jáne alańy 30 sharshy metr ıesiz úı órtenip ketti.
«Tilsiz jaýdy» aýyzdyqtaýǵa departamentke qarasty órt sóndirý jáne apattyq-qutqarý jumystary qyzmetinen 6 tehnıka, 27 adam qatysty. Sondaı-aq orman jáne janýarlar dúnıesin qorǵaý mekemesi men «Jaıyq taza qala» JShS-dan qosymsha kúshter tartyldy. 
Qazirgi kezde órttiń shyǵý sebepteri, keltirilgen shyǵyn, kináli adamdar anyqtalý ústinde.
Sońǵy kúnderi óńirde kúnniń kúrt ysýy saldarynan órt qaýpi kúsheıe túsýde.
Aıta keteıik, 2015-2016 jyldary Batys Qazaqstanda 59 orman órti tirkelip, sonyń kesirinen orman qoryna 29,4 mln. astam teńge zalal keldi.
