Oral qalasy mektepterinde 200-den astam qyzmetker qysqarýy múmkin
ORAL. QazAqparat – Oralda «Bilim servıs» atty jańa kommýnaldyq memlekettik mekeme quryldy, dep habarlaıdy QazAqparat tilshisi.
Mekeme basshysy Murat Baımenovtiń aıtýynsha, «Bilim servıs» bilim salasynda býhgalterlik esep júrgizý jáne tehnıkalyq máselelerdi sheshýmen aınalysatyn bolady.
Buǵan deıin qaladaǵy 50 orta mekteptiń árqaısysynda birneshe býhgalterden boldy.
2017-2018 jyldary respýblıka boıynsha bilim salasynda 9500 tekserý júrgizilgen. Sonyń 80 paıyzynda buzýshylyq derekteri anyqtalǵan joq. Alaıda mektep dırektorlarynyń qujattardy kórsetip, túsindirýge kóp ýaqyty ketti. Budan bulaı olar mektepti jóndeý, sharýashylyq jumystaryna bas aýyrtpaıtyn bolady.
«Tehnıkalyq qyzmetkerlerdi bizder qabyldaıtyn bolamyz. Olar bizde shtatta bolǵanymen, mektepterde jumys jasaıdy. Jedel toptar qurylyp, mektepterden túsken usynysqa sáıkes buzylǵan nárselerdi retke keltiredi. Bul 180 mln teńgeni únemdeýge múmkindik beredi», deıdi M.Baımenov.
Jańa mekeme aldaǵy jyldyń basynan jumysyn bastamaqshy.
Onyń sózine qaraǵanda, jańa mekeme apparatynda 50 býhgalter, 10 ekonomıst jumys jasaıtyn bolady. Olar bilim salasynda jasaǵandar ishinen iriktelip alynady. Sondyqtan býhgalterler, elektrıkter, santehnıkter jáne basqa mamandar arasynan 226-daı adam qysqartylady. Olardy jumysqa ornalastyrýmen, qajet bolǵan jaǵdaıda qaıta oqytýmen qala ákimdigi aınalysady.
Buǵan rıza bolmaǵan qala mektepteriniń býhgalterleri kásipodaqqa júgindi.
Oblystyq bilim jáne ǵylym qyzmetkerleri kásipodaǵy uıymynyń tóraǵasy Marat Daýpaev máseleniń ońtaıly sheshilýi úshin jumystanyp jatqandyǵyn jetkizdi.
«Osynshama adamnyń qysqarýy ońaı emes. Bári zań boıynsha bolýy tıis. Biz osy máseleni «Qazaqstandyq salalyq bilim jáne ǵylym qyzmetkerleriniń kásiptik odaǵy» qoǵamdyq birlestiginiń nazaryna usynbaqshymyz.
Oblystyq bilim basqarmasy basshysynyń qatysýymen qala ákiminde bolyp, óz usynysymyzdy bildirdik. Qala mektepteriniń dırektorlarymen de kezdesemiz. Jalpy Qazaqstan boıynsha qolǵa alynyp jatyrǵan másele emes. Sondyqtan munyń jergilikti jerde ońtaıly sheshilýi biz úshin de mańyzdy», dedi M.Daýpaev.
