Oral qalasy mańyndaǵy qaldyqtar polıgony janyp jatyr
ORAL. QazAqparat - Oral qalasy mańyndaǵy turmystyq qaldyqtar polıgony úsh kúnnen beri janyp jatyr, dep habarlaıdy QazAqparat tilshisi.
Zachagan kenti mańyndaǵy polıgondaǵy qoqys 18 maýsym kúni bastap jandy. Aldyńǵy kúnderi osy kentti basqan kók tútin búgin Oral qalasynyń ortalyǵyna da jetti.
Ásirese, kók tútinniń zardabyn tartyp otyrǵan Zachagan kenti turǵyndary kúndiz de, túnde de syrtqa shyǵyp, demalýdyń múmkin emestigin aıtady.
BQO TJ departamentiniń baspasóz qyzmeti polıgonnyń janyp jatqandyǵyn rastady.
Ótken jyldan beri turmystyq qaldyqtar polıgony «ICM Recaicling» JShS-na senimgerlik basqarýǵa berilgen. Jeke mekemede órtti sóndiretindeı tehnıkalary joq.
Keshe keshkisin polıgonda bolǵan kezde munda bir ǵana órt sóndiretin kólik turdy. Onda otyrǵan órt sóndirýshiler jaz bastalǵaly osynda ekendikterin, alaıda byqsyp janyp jatqan qoqysty sóndirýge shamalary jetpeıtinin jetkizdi.
«Qazirgi kezde polıgonda on tehnıka (ekskavator, júk tıegish jáne basqa kólikter) jumys jasaýda. Olar órtti sóndirýmen birge qoqysty kómip jatyr», dedi «QazAqparat» tilshisine Oral qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń basshysy Mırjan Nurtazıev.
Aıta keteıik, polıgondaǵy mundaı jaǵdaı jyl saıyn qaıtalanyp keledi.
