Oral qalasy qurylys bóliminiń basshysy para aldy degen kúdikpen tergelip jatyr

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń Batys Qazaqstan oblysy boıynsha ókildigi «Oral qalasy boıynsha qurylys bólimi» MM basshysyna qatysty tergeýdi bastady, dep habarlaıdy QazAqparat agenttiktiń baspasóz qyzmetine silteme jasap.

Ol 2020 jyldyń qazan aıynan bastap 2021 jyldyń 11 qazanyna deıin «N»-nyń sybaılastyǵy arqyly JShS dırektory «Sh»-dan pandemııa kezeńinde arnaıy tártipti qoldana otyryp, memlekettik satyp alý shartyn jasasýǵa járdem kórsetken. Sondaı-aq Oral qalasynda «Nurly jer» memlekettik baǵdarlamasy boıynsha jalpy somasy 2,2 mlrd teńgeniń eki 9 qabatty turǵyn úıiniń qurylysy boıynsha oryndalǵan jumystardyń aktilerine kedergisiz qol qoıǵany úshin buryn kelisilgen asa iri mólsherdegi 170,0 mln. teńgeniń 134,0 mln teńgesin para retinde alǵan.

«Oral qalasy boıynsha qurylys bólimi» MM basshysy jáne azamat «N» QR QPK 128-baby tártibinde ustalyp, Oral qalasynyń ÝUI-na qamaýǵa alyndy»,-delingen jemqorlyqpen kúres qyzmetiniń baspasóz qyzmeti taratqan aqparattta.