Oral qalasy kóshelerin jóndeýge 7 mlrd astam teńge bólinip otyr
ORAL. QazAqparat - Oral qalasy kóshelerin jóndeýge 7 mlrd astam teńge bólinip otyr. Bul týraly merdiger mekemeler basshylarymen kezdesken qala ákimi Murat Muqaev málim etti, dep habarlaıdy QazAqparat tilshisi.
Shahar basshysynyń aıtýynsha, osy qarjyǵa barlyǵy 69 kóshe joldary jóndelmek.
Jol qurylysy, aýlalardy abattandyrý jáne balalar sport alańdaryn salý erekshe baqylaýda bolmaq. Tender rásimderi ýaqtyly ótkizildi, aldaǵy aptada qurylys jumystary bastalady.
«Eń bastysy, barlyq jumys der kezinde jáne sapaly atqarylýy kerek. Qurylystyń kepildi merzimi 7 jyl ekendigi belgili. Sondyqtan bizdiń tarapymyzdan baqylaý qatań bolmaq. Kemshilik jiberip, bir-birimizdi kinálap, sotqa júginbes úshin bárin bir ret jasaǵan durys», dep eskertti Murat Muqaev.
Qala ákimi sondaı-aq Depo kópiriniń qurylysy bıyl jazda aıaqtalýy kózdelip otyrǵanyn jetkizdi. Sodan keıin ile-shala «Omega» zaýyty aýdanyndaǵy kópir jabylyp, buzylyp, demontaj jasalady. Onyń da qurylysyn kópke sozbaı bitirý josparlanýda.
foto: vibirai.ru
