Oral qalasy avtobýstarynda elektrondy tólem júıesi engizilmek
Qala ákimi Murat Muqaevtyń aıtýynsha, bul jolaýshylarǵa jolaqyny uıaly telefon arqyly tóleýge múmkindik beredi. Jolaýshylar tasymaldaý sapasyn arttyrý baǵytynda qabyldanǵan 2018-2023 jyldarǵa arnalǵan Oral qalasyndaǵy qoǵamdyq kólikterdi jańǵyrtý tujyrymdamasyna sáıkes bes baǵytqa basymdyq berilip, qoǵamdyq kólikter jumysyn qadaǵalaýdy avtomattandyrý, «Ońaı» jáne SMSBUS elektrondy tólemderin engizý, kólik ınfraqurylymyn damytý, avtobýs baǵyttaryn jetildirý jáne parkterdi jańartý boıynsha keshendi jumystar atqarylýda. Qazirgi kezde barlyq qoǵamdyq kólikterdiń jumysy INFOBUSMOBILE qosymshasy arqyly baqylanýda. Kúni búgin jolaýshylar tasymaldaıtyn qoǵamdyq kólikterdiń 75 paıyzyna GPS qondyrǵylar ornatylǵan. Jyl aıaǵyna deıin barlyq avtobýstar atalmysh júıege qosylmaq.
Aıta keteıik, «Aqyldy qala» («Smart city») jobasyna sáıkes balabaqsha kezegin avtomattandyrý, elektrondy páter ıeleriniń kooperatıvterin jasaý qolǵa alyndy. Sonymen qatar «Qoljetimdi ákimdik» biregeı jobasy júzege asyrylýda. Joba arqyly turǵyndarǵa qalalyq sáýlet, qurylys jáne jer qatynastary bólimi, Oral qalasy ákimdigi keńsesi 16 memlekettik qyzmet túrin kórsetetin bolady.
Turǵyn úı-kommýnaldyq sharýashylyq salasynda «Qazposhta» AQ-men birlesip, «Ǵımarattar saıty» atty elektrondy PIK engizilýde. «Ǵımarattar saıty» - turǵyndar, PIK jáne ákimdikter arasyndaǵy baılanys úshin tegin onlaın alań. Ár ǵımarattyń INDEKSTROENIE.post.kz mekenjaıy boıynsha veb-saıty bolady. Turǵyndar saıt arqyly ákimdikke jáne PIK-ke jaza alady, PIK ózderiniń habarlandyrýlaryn, atqarylǵan jumystar týraly esepterin jarııalaı alady. Sondaı-aq árbir úıge polıtsııa qyzmetkerin, jaqyn mańdaǵy mektepter men balabaqshalardy, medıtsınalyq mekemelerdi, santehnıkti, kótergishti, kúzetti jáne basqalardy bekitýge múmkindik jasalady.
Taǵy bir jańalyq, syrtqy jaryqtandyrýdyń avtomattandyrylǵan basqarý júıesi operatsııalyq shyǵystardy qysqartý, elektr qýatyn tutynýdy ońtaılandyrý, qýat únemdeý baǵdarlamalaryn iske asyrý jáne olardyń tıimdiligin baǵalaýǵa jol ashady. Qazirgi ýaqytta osy jobanyń aıasynda 10 myń shamdy jaryqdıodty shamǵa aýystyrý josparlanýda.
Qala boıynsha joldaǵy qylmysty azaıtyp, qaýipsizdikti saqtaý maqsatynda oblystyq ishki ister departamenti jelisi boıynsha 361, bilim salasynda 1522 beınebaqylaý kamerasy ornatylǵan. 2017-2018 jyldarǵa arnalǵan «Sergek» baǵdarlamasyna sáıkes memlekettik-jekeshelik áriptestik aıasynda 200 beınebaqylaý kamerasyn, sondaı-aq «Qaýipsiz aýla» júıesinde (jergilikti bıýdjet esebinen) 100 beınebaqylaý kamerasyn ornatý kózdelýde.
Sol sekildi «Qazaqtelekom» AQ turǵyn úı ǵımarattarynyń kireberisinde jáne syrtynda beınekameralardy ornatý jobasyn iske qosty. Joba úsh kezeńde júzege asyrylatyn bolady. Qazirgi tańda bes úıdiń kireberisine 10 kamera ornatyldy. Josparǵa sáıkes 2018 jyly qaladaǵy barlyq turǵyn úılerdiń kireberisine 2542 kamera ornatylatyn bolady.
Jýyq arada Oral qalasy ákimdiginiń Telegram-bot qosymshasy iske qosylmaq. Botta qaladaǵy balabaqsha, memlekettik qyzmetter, sporttyq úıirmeler týraly maǵlumattar bolady. Osy arqyly kez-kelgen turǵyn ákimdikke óz suraǵyn qoıa alady. Keri jaýap berý qyzmetin de iske qosý kózdelýde.